Qatserisartut: Suliumajunnaarneq sakkuginianngilarput

Qatserisartut akissarsiaat aaqqinneqarlik - suliumajunnaarnerli sakkuginagu, Qaqortumi qatsersartoq taama oqarpoq, taannalu suleqatiminit, illoqarfinni annerni qatserisartunit isumaqatigineqarpoq.
Allattoq Mads Lynge
marsip 13-at 2012 12:40

- Suliumajunnaarneq illersorsinnaanngilarput, tassami innuttaasut toqqusassineqarlutillusooq pissusilersorfiginissaat nuannarinnginnatsigu.

Ilumoorporli qatserisartut atugarisaat pillugit suliniartoqartariaqarmat.
Qaqortumi qatserisartut peqatigiiffianni siulittaasoq, Vilhelm Lynge Hard oqarpoq.

Nunatsinni qatserisartunut isumaqatigiissut kingulleq 2002 atsiorneqarsimasoq maannamut atuuppoq, taassumalu nutaamik isumaqatigiinniutigineqarnissaa 2009-mi qatserisartunit piumasarineqarsimasoq, Nunatsinni qatserisartut siulittaasuata, Poul Olsenip tusagassiutinut nalunaarutigaa.

Poul Olsenilu radioaviisimut ippassaq oqarpoq, qatserisartut atugarisaat akissarsiaallu sulisitsisunit, tassa Kommunit kattuffianit aamma Namminersorlutik Oqartusanit piaartumik aaqqinneqanngippata Nunatsinni qatserisartut suliumajunnaassasut.

Qatserisartut peqatigiiffiata siulittaasuata taama nalunaarnera, illoqarfinni annerni qatsersartoqarfinni sulisut isumaqatiginngilaat, oqaatigaluguli qatserisartut atugarisaat akissarsiaasalu aaqqinneqarnissaat Qatserisartut Peqatigiiffiata suliniutigisaa tapersersorlugu, suliumajunnaarnerli sakkuginagu tamanna aaqqinneqassasoq isumaqarlutik.

- Kinaluunniimmi isiinnarluni ikuallattoqartillugu qatseriartorsinnaanngilaq, tamannalu illersorsinnaannginnatsigut isummerpugut uangut suliumajunnaarnissamut peqataaniarata.

Qaqortumi qatserisartut peqatigiiffiata, Qamitsip siulittaasua, Vilhelm Lynge Hard taama oqarpoq.

Nunatsinni qatserisartut 852-iusut, qatserisartut nittartagaanni allassimavoq. Illoqarfinnulli annernut KNR-ip paasiniaanermi paasivaa, 852-iusunit ilaasortat ikittuarakasiusut, assersuutigalugu Nuummi qatserisartut 36-t akornanni tallimaannaat peqatigiiffimmut ilaasortaapput.

Nunatsinni Qatserisartut Peqatigiiffiata siulittaasua, Poul Olsen pisumut oqaaseqarsinnaanani oqarpoq. Taassuma illoqarfinni annerni qatsersartut peqatigiiffiini siulittaasut ualimut ataatsimeeqatigissavai.