Qatserisartut pitsaanerusunik atortoqarusupput

Qatserisartut Narsami unammersuarneranni dommerit ilaata Qaqortumi qatserisartup, Peter Erik Thomsenip oqaatigaa, tamakkuusut kujataani qatserisartut kattukkunik anguniagassaasa ilaat.

- Inuiaqatigiit kissaataat annertusiartortillugit uagut aamma saqqumilaarnissarput pisariaqaleraluttuinnarpoq. Imaluunniit eqqarsaatigiinnarlugu ajutoortoqarpat, sissami ajutoortoqarpat, inuiaqatigiit oqassapput qatserisartut ikiussavaatigut. Kisianni tamakku eqqarsaatigalugit inatsisitigut ikiuinissatsinnut periarfissaqanngilagut, taama nassuiaavoq Peter Erik Thomsen.

Tassani pineqarpoq imaatigut annaassiniarnissamut qatserisartut atortoqanngimmata inatsisitigut illersugaasunik. Taamaattumik qatserisartoqarnerup tungaaniit politikerinik sunniiniarneq pisariaqalersoq, Pete Erik Thomsen oqarpoq.

- Kommunit kattunnerisigut immaqa forvaltningip ataani, qatserisartoqarneq immikkoortortanngorlugu takorloorneqarsinnaavoq, ataatsimik aqutsisulerlugu. Immaqa suliassat nutarterinerlu oqinnerussagaluarput.

Aamma Peter Erik Thomsenip erseqqissarpaa, kommunit aningaasakinneri naapertorlugit qatserisartut atortui pitsaannginnerusartut. Taamaattumik kattunnitsinni aningaasassaaleqinerigaluit ataatsimoorullugit sulissutigineqarsinnaavoq, taama naggasiivoq Peter Erik Thomsen.

Qatserisartut peqatigiiffii Paaminiit, Narsamiit, Narsarsuarmiit, Qaqortummiit Nanortalimmiillu Qatserisartut Peqatigiiffii, tamarmik marlunnik aallartitaqarlutik suleqatigiiffiliorput ukiumi aggersumi kattuffimmik pilersitsisussamik.