Qatserisartut peqatigiiffiani siulittaasoq: Ajoraluartumik qaqutigoortuunngilaq
Uummannap nunaqarfiani Ukkusissani tallimanngornermi juunip ulluisa 18-ianni ullaassakkut ikuallattoqarnerani inuit pingasut ajunaarput. Pumpit marluk qamisaataasussat ajornerat pissutigalugu qamisaaniarneq ajornakusoorsimavoq, taamaammat nunaqarfimmiut qattamik imaanut imertariartoqattaartariaqarsimapput.
Qatserisartut peqatigiiffianni siulittaasup, Peter Olsenip alianartumik pisoqarnerani pissutsit tupiguutiginngilai.
- Atortorissaarutinik akornuteqarneq pissutigalugu qatseriniarnerup ajornakusoorsimanera nunaqarfinni ajoraluartumik takornartaanngilaq, qatserisartut peqatigiiffianni siulittaasoq, Poul Olsen KNR-imut oqarpoq.
Qatserisartut illumik ikuallattumik qamisaaniarneranni imermut pumpit marluk ajorsimapput. Pumpillu aappaata orsussaqarfiata imertaqarnera pissutigalugu ajorsimasoq maanna paasineqarpoq. Tamanna Avannaata Kommuniani qatserisartut pisortaarta, Isak Pjettursonip paasissutissiissutigaa.
Taassumalu pumpit aappaata pissusissamisut sooq ingerlasimannginnera maannamut suli ilisimaneqanngitsoq KNR-imut oqaatigaa.
Poul Olsen. Assi: KNR
- Taamaattumik nunaqarfinni aamma atortorissaarutit minnerpaaffissaat ersarissumik inatsisitigut tunngavissaqarnissaat piaartumik suliarineqartariaqarpoq, Poul Olsen oqarpoq.
AAMMA ATUARUK Ukkusissani ikuallattoqarnerani pumpit aappaata orsussaa imertanissimasoq
Aningaasat apeqqutaasut
Qatserisartut tamarmik assigiimmik pingaarnersiuisartut Poul Olsenip KNR-imut oqaatigaa, aningaasalli apeqqutaalluinnarnerarlugit.
- Kommunalbestyrelsit aningaasaliisartuusut apeqqutaalluinnarput.
- Taakku qatserisartoqarnerup tungaanut qanoq amerlatigisunik aningaasaleerusunnerlutik aalajangertarpaat.
- Taamaattumik tassuuna assigiinngisitaarsinnaavoq kommunalbestyrelsemi kommunimiit kommunemut, aningaasaliisarnera ilinniartitaanerup tungaatigut atortorissaarutinillu nutaanik atortoqalernissaq tungaatigut. Aningaasaliinerit assigiinngissinnaasarput.
Avannaata Kommuniani kommunalbestyrelsit ippassaani ataatsimiinneranni Ukkusissani ikuallattoqarnera oqaluuserisaannut ilaavoq. Tamanna kommunip teknikkimut ataatsimiititaliaani siulittaasup, Inuit Ataqatigiinneersup Niels Davidsenip nassuiaatigaa.
Kommunalbestyrelsit qatserinermut atortorissaarutinut aningaasaliinerunissamut piareersimasut tassani aalajangerneqarpoq. Aningaasat qanoq amerlatigisut pineqarnersut ilisimaneqanngilaq. Kommunalbestyrelsip ataatsimiinnerani imaqarniliaq piffissami matumani tamanut suli saqqummiunneqanngilaq.
Qatserinermut atortorissaarutinik qanoq isumaginninnissamut atatillugu pikkorissaanermi allannguisoqassanersoq kommunip misissortalertariaqaraa Niels Davidsen isumaqarpoq.
- Kommunit kaammattoqqiinnassavakka ilinniartitaanermut atortorissaarutinullu pitsaanerusunik ullutsinnullu naleqqunnerusunik anigaasaliineroqqullugit, nunaqarfinni qatserisartut tamakkuninnga peqalernissaat anguniaqqullugu, Poul Olsen oqarpoq.
Pinerluttoqarsimasinnaaneranik misissuisartut nakorsarlu toqusunik misissuisartoq Ukkusissanut ippassaq tikipput. Taakkua ikuallattumut tunngatillugu suli paasineqanngitsunik misissuieqqissaassapput.
