Qatserisartut nersorniarneqartut
Qatserisartut arfinillit ukiuni qulini sullissilluarsimanertik nersornaatisissutigaat. Qatserisartullu marluk, qatserisartullu ittuat ataaseq ukiuni 20-ni sullissilluarsimanertik nersornaatisissutigalugu. Sisamat ukiuni 25-ni sullissilluarsimanertik nersornaatisissutigaat. Taama Kommuneqarfik Sermersuup nittartagaani allaaserinnittoqarpoq.
Nersornaatisisut sisamat Tasiilarmiuupput, tallimat Nuummiuullutik, marluk Kuummiuneersuullutik marlullu Illoqqortoormiuneersuullutik.
Tamatuma saniatigut Illoqqortoormiut Tasiilallu qatserisartoqarfiinik misissuisoqarnera iluatsiinnarlugit tunngaviusumik qatsereriaatsinik ikiueqqaarnermillu pikkorissaasoqarpoq.
Inuit 30-ngajaat pikkorissaanerni peqataasut tamarmik angusipput. Pikkorissartut qatsereriaatsinut atuagarsornerup saniatigut majuartarfilereriaatsit, kiisalu imeq, qajuusaasat, CO-2-lu atorlugit qatsereriaatsinik pikkorissarneqarput.