Qatserisartut: Naneruutit qamittarnissaat eqqaamallugu

Juullileqaaq, naneruutillu igalaat saavanni, ininiluunniit tamani tamaani inissillugit ikumatinneqartut kusanartaqalutik. Ikuallattoqaleriataassagaluarpammi qanoq ilillugit sukkasuumik qaminneqarsinnaappat?
Allattoq Mads Lynge
decembarip 23-at 2013 08:00

Apeqqut taanna Nuummi qatserisarfiup pisortaata tullianut apeqqutigaarput, akivorlu:

- Naneruutinik ikuallattuuleraluarussi erruinermut allarutit imaluunniit errortoreeraangatta allarutit eqqassinniippata taakkua atorneqapallassinnaapput, taavalu innermut annikillisaataasinnaallutik. Tassani imermik aallernissassinnut periarfissaqalissagassi, inneq annertuneruleriataassagaluarpat. Taava annikillereerpat imermik serpartaqqikkutsigu taava aamaqarsimappat qamivissinnaagatsigu, Nuummi qatserisartut pisortaata tullia Steen Boassen, oqarpoq.

Naneruutit ikumatinneqartut anileraanni soorunami qaminneqartarnissaat, taassuma eqqaasitsissutigaa:

- Tassa anileraangatta taakkua eqqaamasartagassagut: Naneruutinik ikumasoqarpa? Taava alakkartereqqaarluta anisarnissaq taanna siunnersuutigissavarput. Kisianni ineeqqat arlaanni ikuallattoortoqalersimanera malugineqarpat, innerlu nammineq qaminneqarsinnaanagu, taava matu matuneqapallattassaaq, tamanna pitsaanerpaajummat. Putsup innerullu siaruaannissaa taamaalilluni annikillisarneqarsinnaammat, qatserisartunillu kalerriinissatsinnut periarfissaqarnerulersilluta, Steen Boassen oqarpoq.

Nuummi najugaqaraanni ikuallattoqarneranillu kalerriiniarluni, taava politiinut sianertoqartarnissaa, Steen Boassenip innersuussutigaa, qatserisartut sukkanerusumik takkussinnaanissaat taamaaliornikkut qulakkeerneqassammat. Sinerissami illoqarfinni allani najugallit normu 1-1-3 sianerfigisinnaavaat. Normullu sianerfigineqarsinnaasut suunersut inuttaasut misissuataartassagaat Nuummi qatserisartut pisortaata tulliata kissaatigaa.

Nigaliliat adventskransit, naneruutillu pinnersakkat sivisuumik uninngasinnaasarput, panertuinnanngorsinnaallutik. Taakku imermik ilaatigut seqqartarneqartarnissaat, Steen Boassenip innersuussutigaa:

- Adventskransit, taavalu naneruutit pinnersakkat, juledekorationit, taakku imermik immillattaartarnissaat pingaaruteqarpoq, Aamma ikuallajaallisaatinik peqalernikuuvoq, qallunaatut brandhæmmende materialemik taaguutillit. Taakkua iluartorujussuupput, tamakkuninnga seqqartarneqarnikut ikuallajaatsupilussuummata, Steen Boassen oqarpoq.

Orpiliallu eqqaani siparnimik imermik imalimmik peqarnissaq pingaaruteqarpoq, ikuallattuulissagaluarpallu eqqissilluni seqqartaasoqarnissaa pingaaruteqarpoq:

- Spandimik imermik imalimmik pinngitsoorata eqqaaniititaqassaagut, ikuallattortarpiaa assavut atorlugit seqqartassallugu. Taamaaliunngikkutta ikuallanngitsoq seqqartartoorsinnaagatsigu. Imeq ataatsikkorsuaq atorutsigu iluamik qamitsisinnaaneq ajoratta. Taamaammat eqqissilluni seqqartaaniarnissaq pingaaruteqartorujussuuvoq, taamaalilluni uniortoornannginnerusarami, Nuummi qatserisartut pisortaata tullia Steen Boassen taama oqarpoq.

Nuummi arlaatigut ikuallattoortoqalissagaluarpat politiinit sianertarnissaq, taassuma innersuussutigaa, qatserisartut sukkanerunsumik takkussinnaanissaat taamaaliornikkut qulakkeerneqassammat. Sinerissami illoqarfinni allani najugallit normu 1-1-3 sianerfigisinnaavaat.