Qatserisartut atukkaminnik pitsanngorsaarusupput
Qatserisartut akissarsiatigut sulinikkullu atugaasa pitsanngorsarneqarnissaat siunertaralugu nuna tamakkerlugu kattuffimmik pilersitsinissaq suliniutigineqalerpoq.
Allattoq Louise M. Kleemann
- Qatserisartut nuna tamakkerlugu kattuffimmik pisariaqartitsipput, taamaattumik kattuffiup pilersinneqarnissaa siunertaralugu marsip ulluisa aappaanni oqarasuaatikkut ataatsimeersuarnissamut aggersaavugut, Sisimiuni qatserisarfimmi holdleder Poul Olsen tusagassiuutitigut nalunaarpoq.
Qatserisartut tapisiaat 3.908 koruuniniit 10.610 koruuninut amerlassuseqartarput, ukiunilu 19-ini kingullerni qaffaavigineqarsimanatik.
- Qatserisartut tunngaveqanngitsumik soraarsinneqarsinnaapput aamma sinerissami illoqarfinni assigiinngisuni assigiinngiiaanik atugassaqartinneqarput, Poul Olsen oqarpoq.