Qatserisartut: Atornerlunneqarpugut

Ilaatigut akissarsiaritinneqartartut ikippallaarneri naammagiunnaarneqarlutik suliumajunnaarnermik eqqarsaatersulerlutik.

Nunatsinni qatserisartut Namminersorlutik Oqartussanut 2009-mi saaffiginnipput, qatserisartut atugaasa pitsanngorsarneqarnissaat noqqaassutigalugu, Namminersorlutilli Oqartussat ukioq manna tikillugu suli qisuariarsimanngitsut, Kalaallit Nunaanni Qatserisartut Peqatigiiffiata siulittaasua Poul Olsen oqarpoq.

- Suliaq taanna 2009-mili ingerlarusaarpoq. Piumassutsitsinnik qatserisartuugatta malartaasersinnaanngitsugut, Namminersorlutik Oqartussat oqarput. Tassalu aatsaat saniatigooralugu qatserisartuugaanni Namminersorlutik Oqartussanut piumasaqartoqarsinnaasoq, Poul Olsen oqarpoq.

Saniatigooralugu qatserisartoq Iluliarmiu, Jakob Kristiansen oqarpoq qatserisartut atugaat ullutsinnut naleqqukkunnaarsimasut.

- Qatserisartuuneq ullutsinnut naleqqunnerusariaqalerpoq,  qatserisartutuinnaq atorneqarneq ajoratta, ilaatigummi tammaaneqartunik aallersinneqartaratta, tamannalu misigissusiiarnartarluni aammalumi akissaatit eqqarsaatigalugit taakku ullutsinnut naleqqukkunnaarsimapput, Jakob Kristiansen oqarpoq.

Nuummi piumassutsimik qatserisartup ukiumut ajunngitsorsiarisarpai 12.000 koruunit, Ilulissanili suleqataata ukiumut ajunngitsorsiarisarlugit 3.000 koruunit. Illoqarfinni assigiinngitsuni ajunngitsorsiat nikiganerisa aaqqinneqarnissaat suliassat pingaarnersarigaat, Poul Olsen oqarpoq.

- Piumasaqaatitta annerpaartaraat sumi najugaqarneq aallaavigalugu akissaasersueriaatsip atorunnaarsinneqarnissaa, taamaalilluni suliat assigiit assigiimmik akissaasersorneqarnissaat piumasaralutigu, Poul Olsen oqarpoq.

Suleqataata Iluliarmiup, Jakob Kristiansenip siulittaasuni isumaqatigaa.

- Qatserisartuinnaq atorneqarneq ajorpugut, tassami allaat takornarianik tammaaneqartunik ujarlersitaasarpugut.

Piumassutsiminik qatserisartoq, Jakob Kristiansen oqarpoq.

Kalaallit Nunaanni Qatserisartut Peqatigiiffiata, Sulinermik Inuussutissarsiutillit Kattuffiat, SIK siunnersuisussatut suleqatiserisimavaa.

Nunatsinni qatserisartoqarnermut akisussaasoq, Jens B. Frederiksen pisumut oqaaseqarumanani oqarpoq, Aningaasaqarnermut Naalakkersuisup, Maliina Abelsenip isumaqatigiinniarneq akisussaaffigigaa oqaatigalugu. Maliina Abelsenillu pisortani pisumut suli oqaloqatiginnginnamigit oqaaseqarsinnaanngikkallarluni oqaatigalugu.