Qatserisartoq: Qatserisartut kattuffittaarlik!
- SAR beredskabi kisiat eqqarsaatiginngikkaluarlugu kisianni nunatsinni qatserisartut atugaat pitsanngorsartariaqartut ilisimalluinnarpara. Soorlu illoqarfimmiit illoqarfimmut assigiinngippallaarnerujussui, qatserisartoqarneq eqqarsaatigalugu illoqarfiit ilaanni kommunet eqeersimaarput ilaallu soqutigisaqarpallaaratik, Poul Olsen oqarpoq.
Taanna erseqqissaavoq ilaatigut ajornartorsiutit tamakku kattuffiliornikkut aaqqinneqarsinnaasut.
- Kattuffeqannginnerup takutippaa qatserisartut qanoq nipaatsigisut, matullu tunuani oqallinnerit ingerlanneqartartut, tamakku saqqummerluni ingerlanneqarsinnaanissaat pingaartuuvoq, oqarpoq.
Poul Olsen aperaarput kattuffimmik pilersitsinikkut ajornartorsiutit suut aaqqinneqarsinnaassanersut.
- Soorlu akissarsianut tunngasut massakkut annertunerusumik qatserisartuniit suliniutigineqarneq ajorput. Kattuffeqalernikkut akissarsiat isumaqatigiinniutigineqartarsinnaapput, oqarpoq.
Aperaaput sooq massakkut aatsaat taamatut tutsiunnersoq.
- Ukiuni tallimani kingullerni maani Danmarkimi ilinniarnera tunngavigalugu najugaqarpunga, pisussaasorisimanngilangalu taamatut oqaaseqarnissannut, isumaqarsimagaluarpunga qatserisartut Kalaallit Nunaanni najugallit namminneq tamanna anguniartariaqaraat, kisiannili ulloq manna tikillugu takusinnaavara taamatut anguniagaqartoqanngitsoq, taamaattumik oqallissaarineq taanna aallartikkusulersimavara Poul Olsen oqarpoq.
Kujataani qatserisartut qanittukkut peqatigiiffittaarsimasut Poul Olsenip aamma oqaatigaa, taamaattumillu nuna tamakkerlugu qatserisartut kattuffeqartariaqarnerat erseqqissaatigaa.
