Qatarimi kalaallip igasup arsaattartut tusaamasat allallu ulluni makkunani nerisassiuuteqattaarai
- Nunarsuaq tamakkerlugu tusagassiortut katersuuttarfianni igasarpugut, taava arsaattartut ilai tusaamasat aamma isertarput, neriartorlutik taavalu apersorneqariartorlutik.
Qatarimi neriniartarfimmi, Qatar national convention centretimi igasut naalagaat, Henrik Inuk Poulsen, oqarpoq.
Isikkamik arsaattartut tusaamasarsuit soorlu Christian Eriksen aamma Kylian Mbappe ulluni makkunani Qatarimi nunarsuaq tamakkerlugu unammersualeruttorput.
Qatarimi illoqarfiit pingaarnersaani Dohamiippoq kalaaleqaterput igasoq Henrik Inuk Poulsen, taanna igasut naalagaattut ulluni makkunani ulapeqaaq.
- Igasut naalagaatut atorfeqarpunga igasunut 190-it missaaniittunut, igasunut naalakkat marluuvugut, taava aamma executive chefeqarpugut, immaqa sisamat tallimanik.
Nunarsuaq tamakkerlugu isikkamik arsaannermi pissartanngorniuttoqarnerani sulisorpassuit nerisaqarnissaat kalaaleqatitta suleqataaffigaa.
Nunarsuarmi tamakkerlugu tusagassiortut Qatarimi malinnaasut neriniartarfimmut tassunga neriartukaasarput.
Henrik Inuk Poulsen Spaniami najugaqarpoq, taannalu Qatarimi igasut naalagaarusunnersoq aperineqarsimavoq. Arsaattartullu tusaamasaaqisut igaffigisaannut neriartortartut taanna oqaluttuarpoq.
- Messi, Cristiano Ronaldolu isertut tusarpakka, kisianni uanga ulapinnermut alakkarnissaannut piffissaqarnikuunnginnama takunngitsoorpakka, taanna oqarpoq.
Arsaattorpalaaq
Nunarsuaq tamakkerlugu isikkamik arsaannermi pissartanngorniunnermi nunat anngussimasut 32-t unammeqattaarput. Suliffigisaminiillu anillakkaangami unammerpalaaq tusarsaasartoq Henrik Inuk Poulsenip oqaluttuaraa.
- Arsaattarfissuup stadiumip eqqannguani suligatta silamut anillakkaangatta arsaattoqaraangat tusaasarparput.
Nunarsuarmilu arsaalluni pissartanngorniutivinnissaq decemberip 18-iani naammassineqassaaq.
Arsaattut KNR2-kkut isiginnaarsinnaavat.
- Sapaatip akunnerata siuliani kingullermi sulinnginnitsinni illoqarfimmi aneeratta inuit nuannaaqaat. Aqqusinermi sumi tamaani inuit nuannateqaat silaannaq nuannerluni nuannaarnaqaaq.
Henrik Inuk Poulsen igasut pisortaatut atorfeqarami, sapaatip akunneranut ullut arfinillit suliffigisarpai. Taanna ullormi akunnerit aqqanillit sulisarluni oqaluttuarpoq.
Henrik Inuk Poulsen Qatarimi decembarip 23-ata tungaanut sulisussaagami ulapiinnavinnissani naatsorsuutigaa.
- Tassa ulapittaqaagut ullut tamaasa, ulapiinnaavippugut. Arsaannerit naammassereerpata aamma aatsaat unittussaagatta tassa ulapiinnaavinnissarput naatsorsuutigivarput.
