Qatanngutigisaq imminorluni toqummat inuuneq unittutut ilivoq
- Qanigisaq imminorpat ammasumik oqaloqatigiissutigissarlugu qaangerneqarsinnaasoq Mikael Rosing oqarpoq.
“Qatanngutigisap imminorluni toqunerata kinguninngua misigisaq sakkortoorujussuuvoq ! Qatanngutigisaq peroriartoqatigisaq ukiumik ataasiinnarmik angajulliusoq annaallugu soorlu suna tamarmi unittoq, soorlu suna tamarmi kipisoq”, Mikael Rosing oqarpoq. Qatanngutigisamit misigisimasat ajunngitsut eqqarsaatigisarlugit Mikael-ip aliasunnini atorsarninilu qaangerpaa. Qatanngutini imminorluni toqunera pillugu ammasumik inoqatiminut oqaluuserisarpaa, tamannalu iluaqutigivaa.
Mikael Rosing aliasuninni artorsarnininilu pillugu pisortanit ikiorneqarani, imminut suliaraluni aliasunnini qaangerpaa, tamannalu ajunngilaq, Mikael Rosing oqarpoq.
Mikael Rosingip qatanngutimi imminorluni toqunerata kingornagut erinarsuusiorpq ateqartumik ”Qatanngut annaasaq” erinarsuusiornermi kingornagut isummersoqatiginnikkusuttunit saaffigineqartarpoq.
Artorsaateqaruit imminornissamilluunniit eqqarsaateqaruit, Paarisap oqarasuaatikkut saaffiginnittarfia normu 134 unnukkut arfineq marluniit qulit tungaanut ammasarpoq, taanna kinaassutsimik taasinngikkaluarluni oqaloqatiginnittarfiuvoq.
telefon 146 inuusuttut inersimasullu artorsaateqartut aliasuuteqartut imminornissamillu eqqarsaateqartut saaffiginnittarfigaat. telefon 146 pingasunngornikkut arfininngornikkullu unnukkut arfineq marluniit qulingiluat tungaanut ammasarpoq. Atermik taasinaní siunnertittoqarsinnaavoq.