Qatanngutigiit qimussernermi ajugaapput
Allattoq Najaaraq Egede
marsip 26-at 2006 13:36
Sisimiuni ulluni pingasuni qimussernersuaq tallimanngormat aallartittoq, nalunaaqutaq marlunngulersoq naammassivoq.
Qimussertitsinermut aaqqissuisoq Frederik Kleist oqarpoq inuit 1500-t missaaniittut Nilliasumi katersuussimasut qimussernersuarmi peqataasut apuukkiartortut malinnaaviginiarlugit.
Ajugaasoq tassaavoq Ukkusissaneersoq Edvard Samuelsen.
Edvard Samuelsenip nukaa Nukannguaq Samuelsen, Nuugaatsiameersoq, ajugaasumut tulliulluni apuuppoq, minutsinik marlussunnik kingulliulluni.
Normu 3-nngortoq tassaavoq Niaqornaarsummiu Lars Petersen.
Arfininngorpat qimusserluni nunatsinni pissartanngorniunnerit ullaap tungaani qulinut aallartissapput. Peqataasut 46-ssapput, kilometerillu 40-t ingerlaarfigineqassallutik.
