Qatanngutigiit puigornermik nappaammik ilisimatinneqanngitsut

- Aallaqqaammut ullut qaninnerit eqqaaneq ajorpai ukiulli ungasinnerit eqqaasarlugit, soorunami uagut tamanna eqqumiigisarparput, tassami qanga pereersut ullumikkumut naleqqussassaanngitsut eqqartortualermagit ilaannimi eqqumiitsorujussuarnik oqariataartarami, Agathe Barlaj oqarpoq.

Taanna qiasunngulluni oqarpoq qatanngummi nuliarigaluani toqoreernikuusoq uumasutut ilillugu eqqartuleraangagu artornartuusartoq.

Naja Hansen aamma Agathe Barlaj Kapisilimmiuupput, taakku qatanngutaat 2003-mi puigortunngorluni aallartippoq, kingornalu puigortunngortunut angerlarsimaffimmut Nuummiittumut Tikitamut inissinneqarpoq.

- Aallaqqaammut suna nappaatigineraa paasitinneqanngilagut, ulloq manna tikillugu suli iluamik paasitinneqanngilagut, tamannalu soorunami issanngunartuuvoq, aamma tusarsiiginnavikkatta paasiniaanikuunngilagut, Naja Hansen oqarpoq.

Puigortunngortut pillugit Inatsisartuni oqaluuserisassanngortitsisimaneq Naja Hansenip Agathe Barlajillu iluarisimaarpaat.

- Tapersersornartorujussuuvoq taanna neriuppugut iluamik qanoq iliuuseqarfigineqassasoq, ilaannimi kukkusumik iisartagaliisaramik, immaqalu taanna inuuneranut sanngiillisaataasarpoq. Neriuutiginarpoq assut malersorneqarluaqqullugu aallaqqaammut immaqa kukkullutik nakorsaasersuisarput taavalu inummut sunniuttarluni kingunerluttarlunilu,

Agathe Barlaj oqarpoq.