Qatanngutigiit Kreutzmannikkut timersornermut ambassadørinngortut
Siornatigut aningaasarsiutigalugu assammik arsartartuusut Angutimmarik aamma Akutaaneq Kreutzmann aasaq manna Maniitsumut angerlarput.
Timersuutitilli atoqqitassaajunnaarlugit toqqunngilaat. Angerlarput misilittakkatik meeqqanut inuusuttuaqqanullu ingerlateqqikkusullugit. Qeqqata Kommuniata maanna takutippaa qatanngutigiit Kreutzmannikkut timersornermut tunniusimanerat qujamasuutigineqartoq.
AAMMA ATUARUK Akutaaneq Kreutzmann aamma angerlarpoq
Timersornermut ambassadøritut toqqarneqarnerat sapaatip akunnera kingulleq kulturi timersornerlu pillugit kommunep isumasioqatigiissitsinerani.
- Qatanngutigiit maligassiuipput takutikkamikku illoqarfimmi inukitsumi Maniitsutut ittumi peroriartoraluarluni angusarissaartoqarsinnaasoq. Tassami takutippaat allaat aningaasarsiutigalugu unammisartunngortoqarsinnaasoq Danmarkimilu pikkorinnerpaani unammisartunngortoqarsinnaavoq illoqarfimmit anginngitsumeersuugaluarluni, Qeqqata Kommuniani borgmesteri Malik Berthelsen KNR-mut oqarpoq.
Misilittakkat atorluarniarpaat
Akutaaneq aamma Angutimmarik Kreutzmann suliassamut uppernarsaatitut aappalaartunik jakkinik tunineqarput. Maniitsumut angerlarnerminni erseqqissarpaat nammineq piumassutsimik suliniaqataanikkut timersornermi siuarsaaqataarusullutik.
- Qatanngutigiit misilittagaasa atorluarnissaat assut soqutigaarput minnerunngitsumik meeqqat inuusuttuaqqallu timersornermut soqutiginnilersinniarneranni. Tamanna pisinnaavoq nuannaartorisanik qanimut isigisaqarnikkut, Malik Berthelsen oqarpoq.
- Akutaaneq aamma Angutimmarik Kreutzmannitut piukkunnassusilli akuttupput. Taamaattumik timersornermut ambassadøritut toqqarpagut, Malik Berthelsen oqarpoq.
AAMMA ATUARUK Assammik arsarneq: Nunanut allanut unammisartuni sunniutilik angerlalerpoq
Qeqqata Kommunia aamma timersoqatigiit kattuffiat GIF suleqatigiinnissamik atsioqatigiipput Nunatta nunarsuarmi timimik atuinerpaaffinngortinniarnerani suleqatigiissallutik.
Taamatut suleqatigiilerneq malunnartinniarlugu pingasunngornermi Maniitsumi pisuttuaqatigiittoqarpoq borgmester Malik Berthelsen siuttoralugu. Aaqqissuussami peqataasorpassuaqarpoq unnulerneranilu seqinnersumi silagissioqalutik.
