Kina qassutinut amuarneqanngitsoorsimasunut akisussaasuua

Qassutinik qaqinneqanngitsoornikunik qalluineq oqartussat kisimik aningaasaliiffigisariaqanngilaat.

Aalisartut namminneq utaqqiinnaratik iliuuseqarsinnaasut kujataani aalisartut peqatigiiffianni siulittaasuusimasoq Konrad Ananiassen oqarpoq.

- Peqatigiiffiit ikiortigalugit nunatsinnut akisorujussuanngitsumik saliisarneq oqaluusereqqinneqartariaqarput. Ullumikkut aningaasaateqarfippassuaqarpoq, soorlu assersuutigiinnarlugu kommunit KNAPK-lu, Konrad Ananiassen oqarpoq. Taanna 1980-ikkunni kujataani aalisartut piniartullu peqatigiiffiani siulittaasuunermini qassutinik amuarneqanngitsoorsimasunik qalluinermut suleqataavoq.

Ikioqatigiilluni suleqatigiinnikkut ajornartorsiut akisunngitsumik aaqqiivigineqarsinnaasoq aamma oqaatigaa. Taakku kittorartoornikkut annaaneqarsimanngillat, aalisartulli namminneq amuariartorsimanngikkaat paasissutissiissutigaa.

KANUAANA: Aalisartut akisussaaffigaat

Aalisartunut nammineq torersaasariaqarneraaneq Kalaallit Nunaanni Aalisarsinnaanermut Akuersissutinik Nakkutilliisoqarfimmi (KANUAANA aaqq.) inspektørip Mads Trolle Nedergaardip isumaqatigaa.

- Aalisaatit eqqortumik nalunaarsorneqarnissaat aalisartup akisussaaffigaa, qassutaarsersimatillunilu nammineq tigoqqinnissaattaaq akisussaafigalugit, Aalisarnermut akuersissutinut inspektøri Mads Trolle Nedergaard oqarpoq.

Kujataani qassutit amuarneqanngitsoorsimasut ukioq manna 45-t nassaarineqarsimasut aamma paasissutissiissutigaa.

KNAPK: Nammaqatigiittariaqarpugut

Aalisarnerli inuiaqatigiinnut aningaasarsiorfittut pingaarnerpaajutillugu imartatta saligaatsuutinnissaa tamatta akisussaaffigigipput, aalisartut piniartullu kattuffianni siulittaasoq oqarpoq.

- Pissutsit taamaanneri tunngavigalugit tamatta nammaqataasariaqarpugut, uanilu amigaataasoq tassatuaavoq pisortatigoortumik immikkut aningaasanik immikkoortitsivigineqarneq ajormat, uffali nunatta inuiaqatigiillu susassaqartitaanerannut taama pingaaruteqartigisoq, KNAPK-p siulittaasua Henrik Sandgreen oqarpoq.

Ilulissat kommuniugallarmat qassutinik amuarneqanngitsunik saleersuarnerup nalaani aalisartut ningittakkersorunnaarallartartut aamma oqaatigaa. Piffissami tassani aalisartut aningaasarsioratik akiliisarnerat naammareernerarpaa.

Oqippallaaqaaq oqassalluni aalisartut namminneq piniutaarsersimagamik namminneq akilertariaqarpaat. Taanna inissaminiinngilaq, Henrik Sandgreen oqarpoq.