Qassutinik qaleralinniarneq sapaatip akunnerata tulliani ammarneqarsinnaassaaq

Ukiuunerani qassutinik aalisarneq taamaasilluni ammarneqassasoq, Aalisarnermut, piniarnermut nunalerinermullu naalakkersup Ane Hansenip nalunaarutigaa. Aalisarnermut Aqutsisoqarfik arriippallaamik sullissisoq, aalisartut qinikkallu qanittukkut oqariartuutigaat, Ane Hansenilli isornartorsiuinerit pissutissaqartinnginnerpai. Qassutinik qaleralinniarsinnaatitaannginneq septembarip 28-anili atuutilersumut, sulilu atuuttumut Qaasuitsup Kommunia nammineq akisussaaffeqartoq, Ane Hansen oqarpoq. Ilulissani, Uummannami Upernavimmilu qaleralinniarneq pillugu kommunip malittarisassaliornissaa taamanikkut isumaqatigiissutigineqarpoq.

Malittarisassatut siunnersuutip Namminersorlutik Oqartussanit misissorluaqqissaarneqarlunilu akuersissutigineqarnissaa taamanikkut aamma isumaqatigiissutigineqarpoq. Suliarli kingorna unittuujusavippoq. Qaasuitsup Kommunia malittarisassamut kingusissukkut aatsaat siunnersuusiorpoq, Aalisarnermut Aqutsisoqarfimmut decembarimi aatsaat anngulluni. Siunnersuut Uummannamut taamaallaat aamma atuuppoq. Malittariassatut siunnersuut Upernavimmoortoq ukiup nutaap aallartisimalaarnerani annguppoq, Ilulissanullu Qeqertarsuulli Tunuanut atuuttussamik suli siunnersuusiortoqarani