Qassiarsuup eqqaani nanoq

Allattoq Mads Lynge
decembarip 15-at 2006 16:58

Narsap Kommuneani nannumik takunninneq, Paamiunilu annaassiniarneq tillinniamillu parnaarussineq.

Kujataani politiit assigiinngisitsunik suliassaqarsimapput.

Qaqutigoortorujussuarmik pisoqarpoq, savaatilillu tupigusussimaqaluni. Kisianni tassa ilumoorpoq, Qassiarsuup eqqaani nannumik takunnippoq.

Narsami politiit pisortarigallagaat Olav Nielsen taama oqarpoq.

Paamiuni politiit pisortaat Hans Peter Olsen oqarpoq marlunngormat annaassiniartariaqarsimallutik.

Angut Paamiut kujatinnguani Kangilinerup Qeqertaata eqqaani ningittakkersoriartorniarluni aallarsimavoq, ornitassarli ungasinngimmat, angullu unnukkut arfinernut utersimanngimmat ilaqutai politiinut kalerriisimapput.

- Qujanartumik politiit umiarsuaaraat Sisak ulluni makkunani Paamiuniippoq, politiit pisortaat Hans Peter Olsen oqarpoq.

Sisak akunnerni marlunni ujaasereerluni umiatsiaq inuttaqanngitsoq siumorsimavaa, Kangerluarsukasimmili ikumanermik takusaqarsinnaasimapput. Tassaavorlu angutip ikittaatini atorlugu kalerrisaariniarsarisoq.

Qarlimi kaasarfii peeriarlugit ivikkanik ilallugit ikumatitsisimavortaaq, angullu ajunngitsoq Paamiunut apuunneqarluni.

Angut alla Paamiuneersoq, 25-nik ukiulik, 17-riarluni tillinniartarsimanini persuttaasarsimaninilu pissutigalugit, qaammatini arfineq-pingasuni isertitsivimmiittussanngorlugu pineqaatissinneqarpoq.

Nanortalimmi politiit annaassiniartariaqarsimapputtaaq. Politiit umiarsuaaraat Sisak umiarsuaararlu alapernaarsuut Tulugaq, Alluitsup Paa-p eqqaani angummik ujarlertariaqarsimapput.

Angut appanniarluni aallarsimavoq, angallataali aamma motooriarsimalluni.

VHF-imik radioqarsimanngilaq, ajunaalernermilu kalerrisaarutinik peqarsimanani.

Aatsaat unnua’qeqqanut qiteqquttoq tikissimanngitsoq politiinut angut siarngutigineqarsimavoq, aqaguanilu aatsaat ujarlertoqarsinnaasimalluni.

Ullaap tungaani nalunaaqutaq qulit qaangeraa angut ajunngitsoq illuaqqamilu unnuisimasoq nassaarineqarsimavoq.

- Taamaammat inuit angalaniartut minnerpaamik VHF-imik radioaqartarnissaat kajumissaarutigiinnassavara, Nanortalimmi politiit pisortaat Niels Nyvang Nielsen oqarpoq.