Qassiarsummi siallernissaa neriuutigaat
Narsaatini naatitat ivikkat nerukkaatissallu allat, ukiuunerani savanut nerukkaatissat, juulip 20-ata missaani killorneqartaraluarput. Ullumikkulli narsaatit paneqisut naasimanngilluinnarput.
Jørgine Frederiksen Qassiarsuup eqqaani Tasiusami unnuisarfiutilik Akiata Nuisarfiata qaavaniilluni ima oqarpoq.
- Ajoraluartumik qanga pinerpoq, immaqa maaji aallartilaartoq siallerami tassa manna tikillugu suli sialleqqinngilaq, tamanna aarlerinarpoq. Maannakkut uninngaarfigisatsinni nuna takusinnaavarput assorujussuaq asinngarsimasoq, toqulersoq, ilaa toqoreersimavoq. Taavalu nuna panertorujussuulluni, allaammi nuna manna qulloortiterpoq.
Massakut nikorfaffigisarput qanoq ateqarpa?
Maannakkut Akiata Nuisarfianiippugut, Qassiarsuullu Tasiusallu akornanni qaavata qeqqaniippugut.
Isikkivik isigisinnaavavut kujammut Narsarsuup mittarfia ersippoq taava avannamut Sermiliup kangerlua Tasiusap tungaanut isikkivik ersilluni.
Nunarujorujussuaq isigisinnaavarput. Kajortuinnavinngorsimavoq paningaarami taavalu tatsit paqqersimallutik, tatsit ilaat suami, suami imeqarput.
Tassa taamaappoq ajoraluaqaaq, tamannalu annilaanganarpoq. Maannakkut isigisatsinni tatsit eqqaanni savat ivikkanik qorsooqqinnersiorlutik neriniartut takusinnaavavut. Aamma angalaarluni malunnarpoq savat neriffissaarutingajalersut, tassami isugutannersanut noorarsimapput neriniarfissaminnik ujarlerlutik.
