Qasigiarmiut nakorsataassapput

Qasigiannguani innuttaasut nakorsaqartuaannassasut, Nunap immikkoortuani peqqinnissaqarfimmi nakorsaaneq Anne-Marie Ulrik oqarpoq. Qasigiannguani innuttaasut nakorsap aasamut soraarnerata kingorna nakorsaqarniarnikkut ajornartorsiuteqalernissartik ernumanartoqartikkaluarpaat, nakorsatulli atorfiup sapaatip akunnerani matumani inuttassarsiorneqalernissaa naatsorsuutigineqarpoq.
Allattoq Oline I. Olsen
maajip 08-at 2012 14:23

- Neriuutigaarput piginnaasaqarluartumit qinnuteqartoqarumaartoq, nunap immikkoortuani peqqinnissaqarfimmi nakorsaaneq Anne-Marie Ulrik oqarpoq.

Qasigiannguani nakorsaq aallarpaat taartissaanik pissarsiortoqassaaq.

- Neriuutigaarput nakorsatut atorfiup sapaatip akunnerani matumani inuttassarsiorneqalernissaa, neriuutigaarputtaaq nakorsat piginnaasaqarluartut atorfimmut qinnuteqarumaartut, Nunap immikkoortuani peqqinnissaqarfimmi nakorsaaneq Anne-Marie Ulrik oqarpoq.

Qasigiannguit, Aasiaat, Kangaatsiaq aamma Qeqertarsuaq taakkualu eqqaanni nunaqarfiit Peqqinnissaqarfik Diskomit sullinneqarput. Qasigiannguani innuttaasut ilisimavaat maanna nakorsartik  aasamut soraarniuteqartoq, nakorsamillu nutaamik atorfinitsitsisoqassanersoq nalorninartorsiutigalugu toqqissisimanngissutigaat. Peqqinnissaqarfimmit innuttaasut nassuiaanneqarnissartik kissaatigalugu aggersaapput.

- Isumaqarpunga Qasigiannguani innuttaasullu paaseqatigiilluartugut, erseqqilluinnartumillu paasitippagut Qasigiannguani nakorsamik atorfiup atorunnaarsinnissaanut pilersaaruteqannginnatta, nunap immikkoortuani nakorsaaneq Anne-Marie Ulrik oqarpoq nassuiaallunilu soorunami ilisimaaralugu nakorsamik atorfinitsitsisoqarniarnikkut allanisuulli ajornartorsiuteqarsinnaaneq pisinnaammat. Qasigiannguanilu nakorsatut atorfiup inuttassarsiuunneqarnerata nalaani utaqqiisaasumik nakorsamik sulisoqarumaartoq erseqqissaatigaa.

Qasigiannguani innuttaasut toqqissisimanarinngilaat siunissami peqqinnissaqarfik ualikkut sisamat kingorna attavigineqassappat, Aasiannut peqqinnissaqarfimmi sulisut saaffiginnittunut siunnersuisassapput nalilersuillutillu Qasigiannguani nakorsat imaluunnit peqqissaasut ikiortiserineqassanersut.

- Aasianni peqqissaasoq peqqissaasumulluunniit ikiorti saaffigineqarsinnaajuaannassaaq, taanna kalaallisut qallunaatullu oqaaseqartuuvoq, peqqinnissakkullu ilisimasalik siunnersuisinnaasassaaq. Qasigiannguanilu nakorsaq imaluunniit peqqissaasoq pisariaqartinneqassappat, taava ikiortiserineqartassaaq, Anne-Marie Ulrik oqarpoq.