Qasigiannguit utoqqaat illuliornissaq akissaqartinneqanngilaq
Qasigiannguani utoqqaat illuat pisoqalilluinnarsimasoq isumannaallisaanikkut illersorneqarsinnnaanngimmat Qasigiannguit Kommuneat Namminersornerullutik Oqartussanut saaffiginissuteqarput utoqqaat illuanik nutaamik sanaartornissamik tamakkiisumik akiliunneqarsinnaanermut, kinguneqanngitsumilli.
Borgmester Jess svane oqarpoq Qasigiannguit Kommuneat utoqqaat illuannut 27 millioni koruuninik akilimmik sanaartornissamut akissaqannginngitsoq:
-Qasigiannguit Kommuneat sanaartornermut aningasassaqanngilaq, taamaattumik naalakkersuisut tallimanngormat oqaloqatiginerani kissaaterput apuussimavara, tassalu Namminersornerullutik Oqartussat tamikkiisumik aningaasaligaannik utoqqaat illuat suliarineqartariaqartoq, Jess Svane oqarpoq.
Jes Svane oqarpoq Royal Greenland-ip suliffissua 2001-mi matunerani kommunip ikiorsiissutinik atuisariaqarneratigut utoqqaat iluliornermut atugassaraluit ikiorsiissutinut atortariaqarsimasut.
- Royal greenland kisiat uummatigivarput, taamaattumik aningaasanik allanut aallersinnaasimanngilagut, Jess Svane oqarpoq.
Sanaartornermik inatsit malillugu kommunini sanaartornerni Namminersornerullutik Oqartussat Kommunillu avitseqatigiillutik aningaasaliisarput. Jes Svane Ilaqutariinnermut Naalakkersuisoq Aleqa Hamond aammalu Peqqisutsimut naalakkersuisoq Aii Chemnitz Narup ataatsimeeqatigereerlugit Namminersornerullutik Oqartussanut tamakkiisumik aningaasaliisitsisinnaanermut itigartinneqarpoq.
Jess Svane oqarpoq Qasigiannguit Kommuneat Namminersornerullutik oqartussaniit illuartinniarneqarsinnanngitsoq:
- Qasigiannguit ukiorpassuarni Kalaallit Nunaannut pingaaruteqarluli inissisimanikuuvoq, taamaattumik tamikkiisumik sanaartornermut aningaasaliissutinut tunniussisariaqarpoq, Jess svane oqarpoq.
Jess Svane isumaqarpoq Namminersornerullutik Oqartussat Qasigiannguit aningaasaqarnerat immikkut isigalugu aningaasaliisariaqartut:
- Sunaluunniit inatsit allanngortinneqarsinnaanngilaq siunnersuutigineqanngikkuni, taamaattumik naalakkersuisuniit siunnersuuteqartariaqartoq utoqqaat illuliortariaqarneq immikkut isigalugu immikkut aningaasaliisoqartariaqarpoq, Jess Svane oqarpoq.
Qasigiannguani utoqqaat illuani 1969-imi sananeqarsimasumi inuit 14-it najugaqarput. Jess Svane oqarpoq utoqqaat illuani najugaqartut siniffii ineeqqaniit aninneqarnissaminnut tattuummata ikuallattoqalissagaluarpat pitsorluttut kivillugit anninneqarnissaat pisariaqassasoq.
Ilaqutariinnermut Naalakkersuisoq Aleqa Hammond ullumi ataatsimiimmat oqaaseqartissinnaasimanngilarput.
