Qasigiannguit unittooqqavoq
Qasigiannguit kommuneani aningaasaqarnermut ataatsimiititaliaq decembarip tallimaanni Nuummukarniarpoq, Namminersornerullutik Oqartussanik oqaloqatiginnikkiartorluni.
- Qasigiannguit kommunerput massakkut aningaasaqarniarnikkut imaannanngitsumik inissisimavoq. Kommunemi namminersorlutik sanaartornikkut inuussutissarsiuteqartut suliffiutillillu suliassaaruteqqapput, sanaartugassatigut unittooqqasoqarmat. Royal Greenlandip qalerallerivia unittuussaglauarpat kommunep aningasaqarnera tamarmi unittuussaaq, taamaattumillu Namminersornerullutik oqartussat orninniarpagut, Qasigiannguiani borgmesteri Siumumeersoq Jess Svane oqarpoq.
Qasigiannguani sanaartorneq aallarteqqissappat ikinnerpaamik 20 million koruuninik Namminersornerullutik Oqartussat aningaasaliisariaqartut Jess Svane oqarpoq.
Qasigiannguani utoqqarnut naammineersinnaannginnerusut immikkullu sullittarilinnut angerlarsimaffiliortoqarnissaa pilersaarutaavoq, taassumalu piviusunngortinnissaanut aningaasat 26 million koruunet pisariaqassasut Jess Svane erseqqissaavoq.
Angerlarsimaffissap saniatigut inissianik aserfallatsaaliineq aamma uninngavoq.
Jess Svanep aamma oqaatigaa Qasigiannguit ukiuni kingullerni inuttusiartoqqilersimagaluartut ukioq manna innuttaasut katillutik 1350-it missaanniittut 4 procentii allanut nutserarsimasut illoqarfimmi suliffissaaleqisoqarnera pissutigalugu.
