Qasigiannguit inersimasunut atuarfeqarfinngorniarput

Qasigiannguit inukilliartuinnarnerat allanngortinniarlugu illoqarfimmi inissiat 50-60-it ullumikkut atorneqanngitsut inersimasunik ilinniartitsinermut atorniarneqalerput.

Kommunip siunnersuusiarititaa Namminersornerullutik Oqartussanut ingerlateqqinneqareerpoq.

Qasigiannguani borgmesteri Jess Svane neriuppoq, illoqarfitsik piffissap sivisuallaanngitsup iluani ingerlallualeqqissasoq.

-Inissiarsuit titartagartalersorlugit aningaasartalersorlugit qanorlu atorneqarsinnaanerat eqqarsaatigalugu, Namminersornerullutik Oqartussanut pilersaarummik nassiussivugut. Tassa siunnersuuteqarpugut imatut:

Qasigiannguani inissiat inersumasunik atuartitsivittut pilersitsiffigineqartariaqartut. Nunatta pisariaqartitsinera malillugu inatsisartut ilinniartitaanermut politikkianut naleqqulluinnartut tassa taaguuserlugit ”Inersimasut Qasigiannguani ilinniarfeqarfiat”. Tassani assigiinngitsunik siunertamut ilaasussanik siunnersuuteqarpugut: Angerlarsimaffinni ikiortitut ilinniarneq, angajoqqaarsianut tunngaviusumik pikkorissartitsinerit, innarluutilinnut ikiortinut tapersersortinullu tunngaviusumik pikkorissartitsinerit allallu.

- Nunatsinni inatsisartut naalakkersuisut politikkianut naleqquttumik suliaraarput, nuna tamakkerlugu atorneqarsinnaanngorlugu siunnersuusiaralugu. Siunnersuusiaq naqitanngorlugu inatsisartunut agguaannikuuarput.

Ilinniartitaanermut pisortaqarfik februaarimi aamma ataatsimeeqatigivarput, paasivarpullu Qasigiannguani pilersaaruterput tullianik ataatsimiinnermi aggutsip ulluisa 16-ianni ataatsimiissutissat ilagissagaat.

-Isumalluarpunga, tamanit nilliaatigineqartoq atorfissaqartinneqaqisorlu pilersaarusiaq tamaat naammassereerlugu tunniukkatsigu.

Jess Svanep isumalluaraluarluni, inersimasut atuarfiata ukiormanna aallartinnissaa naatsorsuutiginngilaa.