Qasigiannguarmiut nutaamik atuarfittaarusupput

Init atuarfiusut qiianarmata, kallerup innerata aqqutai ulorianarmata atuarfillu angivallaalerluni akisuallaalermat angajoqqaat nutaamik atuarfittaarusullutik kommunimut saaffiginnipput.

Qasigiannguani Juunarsip Atuarfia 1960-kkut qiteqqunneranneersoq aamma aserfallalluinnarsimasoq nutaamillu atuarfittaarpat pitsaanerusoq, atuarfiimmi siulersuisut pisortarlu Kommune Qeqertalimmut siorna 2021-mi juunimi inassuteqarput.

Atuarfiup pisortaa Aqqa Samuelsen oqarpoq avatangiiseq ilikkarluarfiusoq pilersinneqassappat nutaamik atuarfiliornissaq pisariaqartoq. Atuarfiup aserfallannera ima ilaatigut oqaluttuaraa:

-Ulorianarsilertut ukua oqaatigisariaqarput; atuarfiup qullii, kallerup innerata aqqutai, silammut matorsuit aamma nutaanngilipput, taavalu aamma eqaarsaarfiup natia ukiuni arlalinni aamma iluarsartuunneqarani aamma suli aserfallakkiartuinnarpoq piffissap ingerlanerani. Igalaat ussiittorujussuuput aammalu atuarfiup silataata iluatalu iigartai aserfallattut annertoorujussuarmik takuneqarsinnaapput.

Atuarfiup natia fysikkertarfillu aamma pisoqaleqisut Aqqa Samuelsen oqarpoq. Atuartuttaaq ikisilisimammata atuarfik angivallaalersoq ingerlatsinermut annertuumik aningaasartuutaasartoq taanna aamma oqarpoq nangillunilu:

-Pisariaqarluinnarpoq ullutsinnut naapertuunnerusumik atuarfimmi atuisunut tamanut pitsaanerpaamillu iluarsaatassat iluarsineqassappata atuarfimmik nutaamik sanaartornissaq pitsaanerpaassasoq oqartariaqarpugut. Aqqa Samuelsen oqarpoq.

Zoe: atuarfipput qiianartarpoq

Juunarsip Atuarfiani atuartut ilaata Zoe Thorin Nielsenip atuarfimmi aserfallannera ima oqaluttuaraa:

- Iseraangatta klasse nillertorujuusarpoq taavalu kusilaartarlutik, qalialu nakkaasarlutik. Soorlu nuannerulersoortarpugut ukiuunerani, atuarfik nillertarami. Soorlu igalaat nutaanngortikkusunnarput nillertarnera pillugu.

Taamaammat Zoe Thorin Nielsen kissaateqarpoq:

-Atuarfiup nutaanngornissaa kissaatigaarput. Atuarfimmik nutaamik kuserneq ajortumik, taavalu nillerterujussuarneq ajortumik. Sukkinnanngitsumillu. 9. klassemi atuartoq Zoe Thorin Nielsen taama oqarpoq.

Angajoqqaaq atuartuutilik: Meerara niaqorluttarpoq

Angajoqqaaq Juunarsip atuarfiani atuartuutilik Karl Poulsen isumaqataavoq:

- Silataanit isigalugu atuarfipput kusanarpoq, kisianni iserlugu aserfallannikooqaaq. Aamma takusinnaasakka malillugit immaqa ussiinnera meeqqat peqqissusaannut soorlumi aamma peqqinnarpallaarunanngitsoq, ullutsinnut naleqqukkunnaarnikuusoq.

Atuarfiup atuartuutiminut peqqinnasusia Karl Poulsenip aamma apeqquserpaa:

-Soorlu niaqorlunnerartarpoq imaluunniit nuffaseqqajaanerit allallu malunnartarput.

Maniitsumi Atuarfik Kilaaseeqqap aserfallalluinnarnera KNR-imi sapaatit akunnerani kingullermi tusagassiaraarput, tassani atuarfik aamma aserfallalluinnartoq angajoqqaanit nutaamik taarseqquneqarpoq. Maniitsumi angajoqqaat ataasinngormat septembarip 19-anni akerliussutsimik takutitsipput:

AAMMA ATUARUK Atsiornernik katersineq: Maniitsoq nutaamik atuarfittaarli

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl