Qasigiannguarmiut ernumapput
Ilulissani Royal Greenlandip suliffissuani qalerallerisut aasap ingerlanerani holdit marlunngortinneqartussaapput, tamannalu Qasigiannguiti kommuneata qalerallerinermit isertitaqartarneranut kinguneqarnerlussinnaavoq. Qasigiannguani borgmesteri Jess Svane oqarpoq.
- Ilulissani holdit marlunngortussanngortut paasivarput, ernummatigilerlugulu maani suliassat annikillerujussuarnerisa kingunerissagaa sulisunik angerlartitseqattaalerneq.
Royal Greenlandip taama allanngortitsinissaanik Qasigiannguit kommuneat toqqaannartumik paasitinneqarsimanngilaq, aalisartunilli ernumasunit ilisimatinneqarsimalluni.
Ilulissani raajalerineq annikillineqarpat raajarniat kilisaataatillit kujammut tunisiartortariaqalissasut ilisimatinneqarsimapput.
Ilulissani qalerallerineq annertusineqartussaq Qasigiannguani sulifissaaleqinermik taamaalillunilu suliffissaarunnermi ikiorsiissutit amerlerujussuarnerannik kinguneqarsinnaasoq Jess Svane oqarpoq.
- Aamma suliffissuarmi sulisut aalajaattut suliffissanik allanik nassaarnissaat uggornartumik kingunerusinnaavoq. Suliffissuarmilu annertuumik suliassaqaleqqissagaluarpat sulisussaaleqisoqalersinnaavoq sulisut allamut nutsersimammata.
Royal Greenlandip allanngortiteriniarnera imminut ataqatigiinngitsoqarsorinartoq Jess Svane oqarpoq.
- Tusaamavarput raajat avannarpariartortut, tassungalu paarlaannarlugu avannaani raajartanik kujammut tunisiartortariaqalernissaq- soorluuna ataqatigiinngitsut.
Qasigiannguit kommuneanni suliffissaaleqisut ukiumut 4 imaluunniit 6 procentiukkajuttarput, suliffissaaleqisullu 8 procentinngussappata tamanna kommunep aningaasaqarneranut annernarsissasoq, Jess Svane erseqqissaavoq.
Jess Svane oqarpoq paasitinneqarsimallutik Royal Greenlandip pisortaanera uani qaammammi nassuiaajartorluni Qasigiannguanukassamaartoq. Royal Greenlandimi ingerlatsinermut siunnersorti Niels Bjerregaard uppernarsaavoq Ilulissani qalerillerisut aasap ingerlanerani holdit marlunngortinneqarnissaat pilersaarutaasoq, tamannalu qalerallit nerpiisa avataanit piumaneqarnerulersimanerannik pissuteqartoq.
Niels Bjerregaard oqarpoq Ilulissani qalerallerineq annertusippat, Qasigiannguani qalerallerivik, sinerissap avataani pisanit kiisalu Qasigiannguarmiut namminneerlutik sinerissap qanittuanit tulaassaannit pilersorneqassasoq.
