Qasigiannguani tunisassiorfik sulisussaaleqiunnaarpoq

Royal Greenland Qasigiannguani tunisassiorfia sulisussaaleqineq peqqutigalugu aasaq manna qalerallit 2,5 tons igiinnartariaqarsimavia. Ajornartorsiullu taamaattoq qanittukkuni nalaanneqaqqissanngilaq.
Assi © : EMJ
septembarip 18-at 2015 15:09

Royal Greendlandip tunisassiorfiata Qasigiannguaniittup sulisussaaleqinera qaammat kingulleq oqallitsitsivoq.

Naak Qasigiannguani suliffissaaleqisut amerlagaluartut, tunisassiorfiup sulisussanik 60-t missaaniittunik amigaateqarnera isornartorsiorneqarpoq.

Tamakkuali maannakkut oqaluttuiaannanngortut, suliffeqarfissuarmi sulisoqarnermut ingerlatsisup Søren Olsen Damgaardip nalunaarutigaa.

Aamma atuaruk  Qasigiannguani tunisassiorfimmi ajornartorsiutit anigorniarlugit ataatsimiititaliortoqarpoq

Tassami Naminersorlutik Oqartussat Nuttartartarnermut aningaasaateqarfia iluaqutsiullugu 

sulisussat katillugit  27-t Qeqertarsuarmit, Sisimiunit, Nuummit Maniitsumiillu tikissimapput.

- Qasigiannguani sulisinnaasunik naammattunik pissarsisinnaasimannginnatta illoqarfinniit allaniik tikisitsisariaqarsimavugut, Søren Olsen Damgaard oqarpoq.

Aasaq manna sulisussaaleqineq peqqutigalugu qalerallit 2,5 tonsit tunisassiorfimmit igiinnarneqartariaqarsimapput.

Fabrikkip 60-t missaaniittunik sulisussaaleqinera sulisunik 27-nik atorfinitsitsinermi ajornartorsiutip aaqqiivigineqarnera, juulip augustillu qaammataani pisat tulaassorneqartut ilimagisamit ikinnerunerinik peqquteqartoq, sulisoqarnermut pisortap nassuiarpaa.

- Qalerallit tulaassorneqartartut ikinnerusimapput ilimagisamit. Pisassiissutit tamakkerlugit aalisarneqarsimanngilalt juulip aggustillu qaammataani. Taamaasilluni sulisut pisariaqartitagut naammattut sulilerput, qujanartumik, Søren Olsen Damgaard oqarpoq.

Aamma atuaruk VIDEO Qasigiannguani tunisassiorfiup sulisuisa sinniisaat misissueqqusivoq

Illoqarfinnit allaniit Qasigiannguanut suliartorusuttut angalanermut aningaasartutaat, Naminersorlutik Oqartussat Nuttartartarnermut aningaasaateqarfiata akilerpai.

Royal Greenlandillu sulisussat inissaqatinnissat isumaginnilluni pilliuteqaraluartoq, sulisoqarnermut pisortaq naammagisimaarinnippoq. 

- Pingaarnerpaavoq uagutsinnut sulisut naammattut aamma sapinngisamik aalisakkerinermik misilittagallit pissarsiarinissaat, Søren Olsen Damgaard oqarpoq.

Aamma atuaruk VIDEO Qasigiannguani Royal Greenland sulisussaaleqivoq