Qasigiannguani Royal Greenlandimi fabrikkimi sulisut aqagu suliartussapput
Ilulissat eqqaani aalisartut qaleralinnik ukioq manna pisakinnerat kiisalu Halibut Greenlandip umiarsuaanut Rubin-imut qaleralinnik sapaatip akunnerata siuliani tunisisartoqarmat, Qasigiannguani Royal Greenlandip tunisassiorfiani sulisut 30-t sinneqartut suliassaarupput marlunngormallu suliunnaarsikkallarneqaraluarlutik.
Suliunnaarsitsigallarnerlu Qasigiannguit tunisassiorfiani sulisunut tamanut ippassaq atuutsilerneqaraluarpoq. Sulisullu 60-it pingasunngornermi, tassa aqagu, suliartorsinnaassapput.
- Ilulissani qaleralinniat Royal Greenlandip tunitsivianut tunisiartoqqittalermata, Qasigiannguani tunisassiorfik ammaqqinneqalerpoq, Qasigiannguani fabrikkip ittua Martin Didriksen oqarpoq.
Paasisat kingulliit naapertorlugit Halibut Greenlandip umiarsuaa tunitsivik Rubin Ilulissat eqqaaniit avalassimavoq, taannalu sumut ingerlanersoq paasisinnaasimanngilarput.