Qasigiannguani qalerallerivik matusussanngorpoq

Qasigiannguani qalerallerivik februaarip aallaqqaataaniit maajip tungaanut qaammatini pingasuni matuneqarallartussanngorpoq, Royal Greenlandip naleqqussaanera pissutigalugu. Suliffissuaq ullumikkut 50-it 60-illu akornanni suliffigineqarpoq, matuppallu kommune inunnik isumaginninnermut qaammammut millionet pallillugit aningaasartuuteqartalissaaq. Tamanna pillugu Qasigiannguit borgmesteriat Jess Svane ima oqarpoq:

- Suliffissuaq matussappat soorunami kommunep karsiata naqqa ingerlaannavittumik tikinneqartussaavoq. Qaammatit pingasut imaannaanngitsuusussaapput, aningaasatigullu imaannaanngitsumik inissinnissarput pissaaq.

Suliffissuarmi sulisut akileraartaannik kommunep qaammammut isertittakkani 300.000-it 500.000 koruunit akornanniittut qaammatini pingasuni annaassagai Jess Svane oqarpoq. Aammali isumaginninnikkut aningaasartuutit imaannaassanngitsut oqarluni.

-Isumaginninnikkut qaammammut 1 million koruunit missaannik aingaasartuuteqartassaagut, allatut ajornartumik taakku akissaqartinniartussaassavagut.

Taama aningaasartuuteqarnissaq isumaginninnikkut sipaarniarnermik kinguneqartariaqassasoq Jess Svane oqarpoq.

- Ajuusaarnartumik imaassinnaavoq allaat utoqqarnik meeqqanik innuttaasunillu sullissineq eqqorneqaratarsinnaasut tamannalu nammakkuminaatsorujussuuvoq.

Qasigiannguani suliffissuaq qalerallerivik atulermat neriorsuisoqarsimavoq, suliffissuaq 80-inik sulisoqarluni ukioq naallugu ammasassasoq.

- Taanna naammassineqanngitsoorpoq. Ukiut sisamat matuma siornagut suliffissuaq qaammatini arfineq marlunni matoqqatinneqarpoq- imaannaanngitsorujussuuvoq. Qasigiannguit ukioq mannaannaq 5 procentingajannik inukilleriarpoq pissutsit tamakku pissutigalugit.

Qasigiannguani qaleralinniuteqatoqarpoq sisamanik Royal Greenland suleqatigalugu pigineqalersimasunik.

- Qaleralinniutitaarnermut atatillugu atsioqatigiissutigineqarpoq qaleralinniutit Qasigiannguanut pinngitsuunngivillutik pilersuissasut, massakkuli taakku maanngaanniit qaammatini pingasuni peertinneqartussanngorput.

Jess Svane oqarpoq qaleralinniutit Ilulissanut nuutsinneqarallartussanngortut.

Jess Svane oqarpoq qalerallaeriffiup matugallarneqarnissaanut Royal Greenlandip peqqutigigaa nalimmassaanissaq.

- Ukiuunerani pisat appariartornerannik nalimmassaaneq tunngaveqartissimavaat. Tamannali uagut ilumoorsorinngilarput qassusersorluni qaleralinniarneq ukiortaamiit aallartimmat, tulaassorneqartullu taamaalillutik annertusingaatsiartussaammat. Taamaattumik tunisassiat ikiliartornerannik oqarneq ilumuunngitsutut oqaatigisariaqarpoq.

Qasigiannguit kommunalbestyrelseani ilaasortat sapaatip akunnerata tulliani Nuummukarniarput pissutsit pillugit Namminersornerullutik Oqartussanik oqaloqatiginnikkiartorlutik. Royal Greenlandi piffissami qaninnerpaami Qasigiannguit kommuneanit attavigineqassasoq borgmester Jess Svane oqarpoq.

Royal Greenlandip pisortaa Henrik Leth, maanna Kinami anaglasoq oqarpoq Qasigiannguit qaleralleriffiata matoqqanissaa siornali pilersaarutaasimasoq.