Qasigiannguani politiit innuttaasunut ikioqqupput

Ikuallatsitsisaqattaarnerit politiinit ilungersunartutut isigineqarput, inuppassuimmi inuunerat ulorianartorsiortinneqarpoq. Politeeq Peter Mathiassen ima nassuiaavoq:

Sisamariarluni ikuallatsitsisoqarsimavoq Qasigiannguit illoqarfiani sapaatip unnuaanit pingasunngornerup unnuaa ilanngullugu. Tassani eqqaaviit inissiani pingasuni illuinnarmilu ataatsimi ikuallatsinneqarsimapput. Ikuallannerit naammattoorneqarsimapput sukkasuumillu qaminneqarsimallutik, taamaalilluni annikitsuinnarmik ajoqusertoqarluni, Peter Mathiessen oqarpoq.

Inissiani inuppassuit inissisimapput sinillutillu. Ikuallatsitsiviusut ilaanni innarluutillit aamma najugaqarput.

- Politiit maanna misissuipput, innuttaasullu piumaffigerusukkaluarpagut Qasigiannguani ilisimannittoqaruni politeeqarfimmut saaffiginneqqullugit.

Ikuallatsitseriarnerit ilaat pivoq politeeqarfiup silataani eqqaavimmi. Politeeqarfik inissiarsuit ilaannut atavoq tassaniillunilu innarluutillit najugaqarfiat. Taamaattumillu ikuallatsitsineq siaruarsimagaluarpat inuppassuit inuuneri navianartorsiortinneqalersimassagaluarput. Taamaammat politiit ikioqqupput.

- Ulorianartorujussuuvoq taamatut ikuallatsitsisaqattaarneq. Illup iigaanut attuumasut ikuallatsinneqartaarsimagamik, ajunaarnernik kinguneqarsinnaallutik. Aamma angajoqqaat, inuusuttuaqqat meeqqallu angajoqqaavi, piumaffigerusuppagut meerartatik oqaluuteqqullugit, ikuallatsitsinerit kingunerisinnaasaannik nassuiaatilaarlugit.

Qasigiannguanilu innuttaasut politeeqarfimmut sianersinnaapput

91 12 22-mut.