Sapaatip akunnerata naanerata siuliani sapaammut ullaassaani Qasigiannguani atisaarniarfiit ilaat Efterskole Villads Villadsenimi atuartut ilaannit atisarpassuarnik tillinniarfigineqarpoq.

Taama politiit KNR-imut ilisimatitsipput.

- Atisarpassuit tillinneqarput. Atisat 100.000 koruunit sinnerlugit nalillit tillinneqarsimasut missingersinnaavara, Qasigiannguani politeeqarfimmi aqutsisoq, Steen Pedersen oqarpoq.

Politiillu tillinniartoqarneranut misissuinerisa takutissimavaat Qasiannguani Efterskole Villads Villadsenimi atuartut qulit atisaarniarfimmi tillinniartuusimasut.

- Efterskolemi atuartut taamaaliorsimapput, Steen Pedersen oqarpoq.

Atuartut eqqartuussivilersuunneqarnissartik naatsorsuutigisinnaavaat

Atuartullu taakkua qulit Steen Pedersen naapertorlugu tillinniarsimanertik paasineqarmat angerlartinneqarsimapput.

- Efterskolermiut kinguneqartitsipput, tamannalu pitsaasuusoq isumaqarpunga, Steen Pedersen oqarpoq, nangillunilu:

- Atisat tillinneqartut ilarpassui nanivagut, taakkualu aamma pisiniarfimmut tillinniarfigineqartumut utertinneqareerput.

Atuartuusimalersullu taakkua qulit maanna angerlartinneqarsimalereeraluarlutik eqqartuussivilersuunneqarnissartik naatsorsuutigisinnaavaat.

- Atuartut taamaaliortut maanna tamarmik angerlartinneqarsimalereerput. Taamaammat suliassartat maanna sumiiffigiligaannut nassiunneqassapput atuartuusimasut tillinniarsimasutut pasineqarlutik killisiorneqarnissaat siunertaralugu. Tamannalu eqqartuussivilersuussinermik kinguneqarumaartoq qularnanngilaq, Steen Pedersen oqarpoq.