Qasigiannguani nuannatissamaaleqaat
Nammineq piumassutsimik aallartittut suleqatigiinnerisigut Sissarsuit Festival pilersippaat taannalu aalisakkerivikup toqqaviani pissaaq.
- Ukiorpassuarni Qasigiannguani festivalertoqarsimanngilaq. Sissarsuit Festival ukiormanna iluatsilluassappat ukiut tamaasa pisartussatut eqqarsaataavoq, aaqqqissuisuniit Inge-Marie Jensen Rosing KNR-imut oqarpoq.
Aalisakkerivikup toqqaviani betoniusumi qulisamik sceneliortoqarpoq taassumalu sioraani issiavilersorlunilu nerrivilersortoqarpoq.
Aasaq naajartulerpoq aaqqissuisullu piffissaq festivalerfiusoq attatiinnalersaarpaat ulluni tulliuttuni iluatsitsilluarnikkut ukiut tamaasa uteqqiattutut pisalissappat.
- Aggustimi sapaatip akunnerata naanera siulleq ajunngivipput. Amerlasuut piffissami tassani angerlarsimasarput aammalu suli kiannera naammalluni silami aaqqissuinissamut, Inge-Marie Jensen Rosing oqarpoq.
Aaqqissuisut Facebook atorlugu pisussaq avammut tusaqqusaarutigisimavaat illoqarfinnilu qanitaanni tamanna malugineqarsimavoq.
- Tusarparput inuppaaluit illoqarfinni qanitatsinniit nunaqarfinniillu tikerarniartut. Taamaammat iluatsitsilluarnissamut isumalluarpugut, Inge-Marie Jensen Rosing oqarpoq.
Nipilersortussat tassapput Marie Mathiassen Ilulissaneersoq Maaliatut ilisimaneqarnerusoq taassumalu Kalak Jazz aamma appeqatigisassavai. Qeqertarsuarmiit Appap Papii tikissapput Qasigiarmiunilu nipilersortut tassaassapput Mariina aamma Ullorissat.
Sissarsuit Festivalen ualikkut nalunaaqutaq sisamanut aallartissaaq meeqqanut aliikkusersuisoqassalluni qulingiluap tungaanut ullorlu naggaserlugu snobrødiliortoqarsinnaajumaarpoq.
Tallimanngornermi nipilersortussat tassaapput Maalia, Kalak Jazz aamma Mariina. Arfininngornermilu nipilersortuussapput erinarsoqatigiit QE 83 qitigissanik atuiniartut Ullorissallu arfininngorneq naggaserlugu unnuakkut marlut tungaannut appisimaassapput.
