Qasigiannguani efterskolissaq innuttaasunit tapersersorluarneqarpoq
Ataatsimiititsinermi efterskolissaq pillugu ilisimatitsisoqarpoq, efterskolimilu pisortanngortussap Rasmus Andersenip ataatsimiititsineq soqutigineqarluarnerarpaa, arlalissuillu efterskolip ikinngutaannut ilaasortanngorput.
- Maani illoqarfimmi efterskolissap tapersersorneqarluarnera nuanneqaaq. Taamaalillutami aallartilluarnissarput periarfissaqarlualerpoq, taamalu sumiiffinni allani atuarunnaartartorpassuit pinngitsoortissinnaassavavut, Rasmus Andersen tusagassiuutinut nalunaarummini allappoq, oqaatigalugulu Qasigiannguit efterskolertussanik tikilluaqqusinissamut piareersimasoq.
Qasigiannguit efterskolissaannut immikkut aningaasaliisoqarnera pissutigalugu Demokraatit piumasaraat ilinniartitaanermut naalakkersuisoq Tommy Marø tunuassasoq. Demokraatit taama piumasaqarnertik ullumi Inatsisartuni saqqummiunniarpaat.