Qasigiannguani efterskole aapperneqarataannaavoq

Kangerlussuarmi efterskolip matuneratigut Qasigiannguani pioreersoq aapperlugu allamik sanasoqassanersoq politikkikkut aalajangigassaavoq.
Allattoq Else Løvstrøm
februaarip 25-at 2010 15:11

Kangerlussuarmi efterskole matuneqarpat, inuusuttuaqqat 80-it tassani atuartaraluartut eqqugaassapput. Kangerlussuarmiittorli matuneqarpat nunatsinni efterskolituaasoq aapperneqassanersoq politikerit aalajangigassaraat.

Kangerlussuarmi efterskolep Qasigiannguani Villads Villadsenip efterskolianut atajunnaarnissaa pillugu, siulittaasoq Nuka Kleemann ima oqarpoq.

- Aallaqqaammulli isumaqatigiissutiginikuuvarput ukioq ataasiinnaq tigummisinnaallutigu ingerlaqqissappallu namminneq soorlu siulersuisuliorlutillu allatullu ingerlaqqissinnaasut, nassuiaavoq.

Inatsisit malillugit efterskole ingerlanneqassaguni peqatigiiffeqarlunilu nammineq siulersuisoqartussaavoq, naammaginartunillu inissaqartitsillunilu illutaqartussaalluni.

Allamik efterskoleliortoqassanersoq ilinniartitaanermut pisortaqarfimmi siunnersortip Kaali Olsenip suli nalunarnerarpaa:

- Tassa politikkikkut taanna aalajangigassaassaaq paasiniaanerit misissuinerillu takutikkumaarpaat politikkikkut aningaasaliinerit pisariaqartut aningaasaliissutaanissaannut piumassuseqartoqassanersoq, Kaali Olsen oqarpoq.

Kangerlussuarmi efterskolimi inuusuttut 80-it aallartittaraluarput ukiulli kingulliit marluk 50-it sinneruttarsimapput. Taamaammat illut pitsaanngippallaarneri inersimasunillu attaveqaateqanngippallaarneq aporfinnut ilaasut Nuka Kleemannip oqaatigaa.

Inuusuttut 80-it Kangerlussuarmiissinnaajunnaartussat Kaali Olsenip Piareersarfinnut saaffiginneqquai, ilaatigut Danmarkimi efterskolersinnaanissaat periarfissat ilagissammasuk.