Qasigiannguani 1700-kkunnitut asimioqarfiliorput
Takorluugaq sapaatiummat piviusunngortinneqarpoq. "Asimioqarfik piviusuusartitaq" Tasersuup sinaani nalliuttorsiualaartitsinikkut ammarneqarpoq.
Qasigiannguarmiut piumassusertik tunngavigalugu peqataasut ilaliullugit Qasigiannguani katersugaasivik ammaanersiornermi atugassanik siorna 2008-mili atisaliortitsillunilu sakkunik sanatitsilersimavoq, illoqarfiullu umiaa iluarsaanneqarpoq qaanniortoqarlunilu. Piumassusertik tunngavigalugu peqataasut unnukkut atuartitsinermut peqataasarput, ataatsimeeqataasarlutik oqalugiarfigineqartarlutillu. Taamaasiornermikkut 1700-kkuni asimioqarfimmi inuunerup asserluinnangajaanik takutitsinissaminnut piareersarput.
Katersugaasivimmi aqutsisoq, Anne Mette Olsvig, ammaanersiornermi oqalugiarpoq, erinarsoqatigiillu QE-83-ikkormiut erinarsornerat ingiortiliullugu umiaq qajartalik tatsip sinaanut tulalluni inuttai 1700-kkornisut unnuiffissaliortut isiginnaarneqarsinnaasimavoq.
Asimioqarfik piviusuusaartitaq aggustimi sapaatit tamaasa sammisassaqartitsisassaaq, taamanikkornisanik atisaliortitsisoqartassalluni toqqiortitsisoqartassallunilu. Sammisaqartitsisarneq ukiap ingerlanerani aamma pisassaaq, asimioqarfik ineriartortinneqassalluni innuttaasunut takornarianullu sammisassaalluassalluni, Anne Mette Olsvig oqaluttuarpoq.
