Qasapip Ullua Kingulleq
Tamanna Sisimiuni kulturikkut illorsuarmi, Taseralimmi, pissaaq, nipilersortartorlu Nunatsinni nuannarineqaqisoq, Ole Kristiansen, nipilersortartuilu, Villads Villadsenip taalliaa taanna tunngavigalugu aliikkusersuissapput.
Taallaq, kalaallit qallunaatsiaallu akersuutilernerannut tunngasoq, Simon Løvstrømimit Ole Kristiansenimillu nutaaliaasumik erinarsuusiarineqarpoq.
Erinarsuutit taakku Ole Kristiansenip CD-liaani kingulliup tulliani, 2011-mi saqqummersumi, ilaapput, nuannarineqaqalutillu.
Tusarnaartitsineq Ilulissani iluatsilluartumik sapaatip-akunnerani kingullermi pivoq, Ole Kristiansenillu kalaallit qallunaatsiaallu akersuutilerannut oqaluttuatoqqamik oqaluttuareqqiinera, Sisimiuni maanna tassa misigineqarsinnaalerpoq.
- Villads Villadsenip taalliaa aqqutigalugu, neriuutigaarput Kalaallit Nunaanni inuppassuit, Qasapitut misigisut, nukissaannik neriuutissaannillu tunisinnaallutigik, Simon Løvstrøm, unnugu tusarnaartitsinissaq sioqqullugu oqarpoq.
