Qarsutsineq pinngitsoortinneqarpoq

Tassa sakkutuut imeq allamut kuutsinniarlugu nunami kussiniliornerat iluaqutaammat.

Kina-mi pisortat sapaatip akunnerata naanerani siusinnerusukkut inuit 200.000-it qimarngussortikkaluarpaat, tassa Tangjiashap tasiata qarsutsinissaa ernummatigineqarmat.

Kina-mi nunap immikkoortuani Sichuanimi nunap sajorujussuarneratigut nunami tamaani kuussuup pingaaruteqarnerpaap Fu-p kuunnera akornuserneqarmat tatsit 30-t pinngortinneqarput.

Maajip aqqaneq aappaani nunap sajunneranit ajunaartut maanna 70.000-iunerarneqarput. Tamatuma peqatigisaanik nunap sajuffigisaani qaqqartoqisumi inuit avinngarusimasuniittut 20.000-it suli maqaasineqarput.

Sapaatip akunnerini kingullerni pingasuni inuit nunap sajunneranit eqqugaasut 15 miliuunit allamut qimarngunneqartariaqarsimapput, naalakkersuisut oqaatigaat ukiuni kingullerni 30-ni nuna aatsaat taamak sakkortutigisumik sajuttoq.