Qarlortartartoq erinniaminik tusarnaartitsilerpoq

- Pissangaqaanga, nammineq erinniaralugit taamaannarami. Uannut alloriarneruvoq pingaarutilik, Arnannguaq Gerstrøm oqarpoq. Taanna Katuami tusarnaartitsinissamut atatillugu Københavns Blæserkvintetimeersut peqatigalugit sungiusartoq naapipparput:

Arnannguaq Gerstrøm Nuummi inunngorpoq, Nuummilu Ilulissanilu peroriartorluni. Klassiskimik musikkonservatoriami ilinniarsimasuuvoq. Kalaallit Nunaanni, Danmarkimi Savalimmiunilu tusarnaartitsisareernikuuvoq, nipilersoqatigiinnillu aamma aqutsisuunikuulluni.

Naak erinniaminik siullerpaamik tusarnaartitsileraluarluni angorusutani angoreersimanerarpai:

- Angorusutakka angoreerpakka, erinniakkami maani appissinnaalereeratsigit, neriuutigiinnarparalu tusarnaariartoqarumaartoq. Inuillu qanoq isumaqarumaarnersut pissanngatigaara. Uannulli pingaarutilimmik alloriareerpunga, erinniakkami Københavns Blæserkvintet peqatigalugit tusarnaartitsissutigissagatsigit, Arnannguaq Gerstrøm oqarpoq.

Arnannguaq Gerstrøm Københavns Blæserkvintetilu Katuami Inersuaq Hans Lyngemi sapaatiuppat tusarnaartitsissapput.