Qarasarissut qimarrannerat ajornartorsiutaavoq
Tuluit oqariartaasiat "brain drain" tassa "qarasarissut qimarrannerat"-nik taallugu, Europamiut suleqatigiiffiata OECD-p nalunaarusiaanni oqaatigineqarpoq, nunani NORA-mut ilaasuni inuusuttut qaffasissumik ilinniagaqarsimasut nunanut allanut nutserarnerat maluginiagassaasoq. Taamaalilluni nunat pineqartut assigiinngitsunut pingaarutilinnut tunngasunik piginnaasalinnik ilanngarteriffigineqartut oqaatigineqarpoq, tamannalu pitsaanngitsunik arlalinnik kinguneqartoq, OECD-mit oqaatigineqarpoq.
Qarasarissut qimarrannerat unitsinneqassappat, OECD-mit oqaatigineqarpoq, Nunani pineqartuni assigiinngitsutigut aningaasarsiorfeqarnissaa pisariaqartoq. Nunat NORA-mut ilaasut inuussutissarsiutinik assigiinngitsunik ingerlatsiviusariaqarput. Aalisarnerinnarmik inuussutissarsiuteqarnikkut, nunat aningaasaqarniarnerat, nunani tamalaani aningaasarsiornikkut allannguutinit sunnertiavallaarpoq. Tamatumalu peqatigisaanik aalisarneq aalisakkanillu tunisassiorneq angutinit annerusumik inuussutissarsiutigineqartarput.
Arnat nunanut allanukarlutik suliffissarsiortariaqartarput. Aamma inuiaqatigiinni arnat angutillu amerlaqatigiinnerat allannguuteqaraangat, inuiaqatigiit pitsaanngitsumik sunnerneqartarput. Tamanna minnerunngitsumik innuttaasut amerliartornerannut sunniuteqartarpoq.
OECD-p ilanngullugu tikkuarpaa, nunat NORA-mut ilaasut akornanni angallanneq annerulersinneqartariaqartoq, nunat taakku akornanni niueqatigiinnerup annerulernissaa siunnerfigalugu.
Ilinniakkanik nutaanik ineriartortitsisoqartariaqarpoq, taamaalilluni inuusuttut ilinniakkanik naleqquttunik, Atlantikup Avannaani atukkanut naleqquttunik, silap pissusaanut, avatangiisinut inuussutissarsiutinullu tunngasunik, højskoleni ilisimatusarfinnilu ilinniagaqarsinnaaniassammata.
