Qarasaasiat timmisartuni atoqqusaalissapput
Malittarisassat nutaat EU-p assartuinermut kommissæriata pisortatigoortumik ullumi saqqummiutissagai ilimagineqarpoq.
Silaannarmi isumannaatsuunissaq pillugu EU-mi oqartussaasut paasisimavaat oqarasuaatit angallattakkat assigisaasalu ikumatiinnarnissaat ulorianartorsitsinavianngitsoq.
Timmisartuutileqatigiiffiilli assigiinngitsut tamanna namminneq aalajangertassavaat.
Qarasaasialli oqarasuaatillu angallattakkat assigisaasalu timmisartornermi ikumatinneqartarnissaannut EU-mit inerteqqut ullumimiit tassa atorunnaassaaq.
EU-mit inerteqquteqarnerit taamaatinneqarnissaannik nutaarsiassaq Air Greenlandimit soqutigalugu ulloqeqqata siorna malinnaavigeqqissaarneqartoq timmisartuutileqatigiiffimmit oqarput.
- Tamatumunnga attuumassuteqartumik oqartussaasut - soorlu Angallannermut Aqutsisoqarfik - oqaloqatigaavut, qarasaasiaaqqallu aamma oqarasuaatit angallattakkat pillugit malittarisassat Air Greenlandip allanngortissanerai nalilerumaarparput, Air Greenlandimi timmisartut ingerlaarnerannik nakkutilliisut qullersaat, Jacob Nitter Sørensen, radioaviisimut oqarpoq.