Qarasaasiat pinnguaatillu orpiup ataaniittut amerlassapput
Illoqarfinni anginerni imaluunniit nunaqarfinni avinngarusimanerusuni najugaqaraluaraanni qarasaasiat, spillit pinngussallu pisiniarfiutileqatigiinni tamani pisiariortorluarneqarput.
Brugsenimi, Kitaani Kujataanilu illoqarfinni arfineq-marlunni pisiniarfeqartumi, tuniniaanermut pisiassanillu pissarsiornermi pisortaq, Finn Christiansen, oqarpoq, inuit decembari tamaat tunissutissarsiniarsimasut.
- Lego-t ukioq manna tunisaalluarput. Aamma DVD-mik isiginnaarut angallattagaq, qarasaasiami pinnguaatit Nintendo Wii-mullu atortussat tjnisaalluarput. Kiisalu meeqqanut arnanulu atisat ingerlanneqarluarlutik, Finn Christiansen oqarpoq.
Taassuma nunarsuaq tamakkerlugu aningaasarsiornikkut ajornartorsiorneq Brugsenimut malunniuppiarsimanngitsoq unnerpaa.
Pisiffik Nunatsinni pisiniarfiutillit namminersortut annersaraat. Tassani pisisartut qarasaasiaq pinnguaat Nintendo Wii spillinullu atortut assigiinngitsut juullimi tunissutissatut nuannerinerpaavaat.
Notebook, qarasaasiaaraq, Pisiffiup illoqarfinni arfineq- marlunni pisiniarfiutaani pisiarineqarnerpaanut tulliuvoq.
Nintendo DS assiliissutitalik, meeqqanut mikinernut naleqquttoq, juullimi tunissutissatut Pisiffimmi pisiaanerpaat pingajoraat
Pisiffiup pisiarfiummini 30-ni juullikkunni kaaviaartitat siornarnit ikinnerulaartut malugineqarsinnaasoq, suliffeqarfissuup pisiassanik pissarsiornermut nittarsaanermullu pisortaa, Morten Caspersen, oqarpoq.
Namminersorlutik Oqartussat pigisaat Pilersuisoq, nunarfinni tamangajanni illoqarfinilu mikinerni avinngarusimasunilu aqqanilinni pisiniarfiuteqarpoq.
Niuernemut pisortap Frederik Olsenip tunissutissatut tunisaanerpaat ima eqqaavai.
- Qarasaasiaarannguit ingerlalluarput. Aamma spillit assigiinngitsut iluarisimaarneqarput. Aamma TV-it tigulluarneqarput, kiisalu meeqqanut pinngussat ingerlalluarlutik, Frederik Olsen oqarpoq.
Sumiiffinni assigiinngitsuni tunitsiviit tunisassiorfiillu tamakkiisumik ammajunarsimanerat Pilersuisumi niuernermi pisortap malunnarnerarpaa.
- Assersuutigalugu Kangaatsiami ukiumut kingullermut naleqqiullugu kaaviaartitavut qaffarianngillat, Frederik Olsen oqarpoq.
