Qarasaasiat akeqanngitsut agguaanneqarput
USA-mi suliniaqatigiiffik programmiliorsimavoq taaguutilimmik ”Qarasaasiaq Angallattagaq Meeqqanut tamanut”. Qarasaasiaq angallattagaq qorsummik qaqortumillu qalipaateqarpoq, atussallugulu ajornanngitsuaraalluni, innaallagissamik atuivallaartorsuunngilaq, qajannaatsuuvoq internetimullu attaveqarluni.
Piitsuuneq pitsaanngitsumillu ilinniartitsisarneq nungusarniarlugit qarasaasiaq atorlugu meeqqat pitsaanerusumik ilinniagaqartalernissaat siunertaasoq, programmimi pisortaq, Nicholas Negroponte oqarpoq.
Qarasaasiat angallattakkat 2 millioninit amerlanerit Afrikami Amerikamilu Kujallermi meeqqanut piitsunut 2005-imiilli tunniunneqareerput.
Programmi taanna Canadami issittunut aamma annguppoq. Atuarfiit pingasut qarasaasianik angallattakkanik akeqanngitsumik neqeroorfigineqarput. Nunavimmi Kangiqsualujjuarmi Ulluriaq atuarfimmi atuartut tamarmik, Labradorimi Nainimi Jenns Havenip atuarfiani atuartut, taavalu Nunavummi Kangiqlinirmi Simon Alaittup atuarfiani atuartut, qarasaasianik qorsunnik qaqortunillu pissapput. Tamakkunani iluatsilluassappata programmi nunaqarfinni allani aamma atortinneqalerumaarpoq.
