Qarasaasiaq mobililu qamikkit

Qarasaasiaq mobililu qamikkit eqqissisimaarlutillu. Siusinnerusukkut attavigineqarsinnaajumalluni suut tamaasa ikumatiinnarneqartaraluarput, maannali allanngoriartortoqarpoq – suummi tamaasa ikumatiinnartarnerat qaangiutereerpoq. Kinguaariit nutaat eqqissisimaarfeqarusuttut takussaaleriartorput:

Qarasaasiami Messengerip ammarnissaa ajornanngitsunnguuvoq aamma e-mailikkut allagarsiassaqarnerluni takulertorneq ajornarani. Peqatigisaanik SMS-ikkut nalunaarfigitinnerit mobilinnut isaaginnavipput taakkualu nakkutiginissaat aamma pisariaqarpoq. Ilaannikkut eqqissisimaarnissaq piffissaqarfigineq ajornartarpoq.

Maannali kinguaariit nutaat eqqissisimaarfeqarusuttartut takkukkiartulerput, taakkua suut tamaasa ikumaterusaaginnarnissaat nuannarinngilaat.

Tamanna inuusuttut nuannarisaannik misissuinerup nutaap ersersippaa. Misissuisarfiup pisortaata Kirsten Poulsenip ima nassuiarpaa:

- Inuusuttut ilaat atortorissaarutiminnik qaminngatitsisartut takussaaleriartorput. Taakkua mobilitik, qarasaasiatik assigisaallu kissaatigisartik naapertorlugu qaminngatittarpaat. Taamaalillutik allanut nukissaqartutut misigisimasarlutik sunissartillu ilisimaarisarlugu. Taamaalillutik avatangiisiminnut oqariartuutigisarpaat piffissaq tamakkerlugu pissarsiarineqarsinnaanatik, allanik aallussaqarnertik pissutigalugu. Mobili ikumatittuaannaraanni pujortartarnertulli pinngitsoorneqarsinnaajunnaartarpoq, Kirsten Poulsen oqarpoq.

Niviarsiannguup ilinniartup 26-nik ukiullip Nadiap qaminngatitsisarnissamik pisariaqartitsineq nalunngilluarpaa.

- Pakatsissutigisarpara inuit isumaqartarmata ullup unnuallu ingerlanerani nalunaaquttap akunnerini 24-ni pissarsiarineqarsinnaassasunga. Piffissap ilaatigut pisariaqartittarpara mobilima e-mailimalu qaminngatinnissaat. Isumaqarpunga ullup unnuallu ingerlanerani nalunaaquttap akunnerinerini 24-ni pissarsiarineqarsinnaanissaq inummut piumasaqaataasoq angivallaartoq. Taamaattumik ilaanneeriarlunga suut tamaasa qamittariaqartarpakka.