Qarasaasiaq atorlugu sianiutisigut nappaatit pillugit nakorsiartoqarsinnaanngorpoq
Peqqinnissaqarfiup Sjællands Universitetshospitali qarasaasiaq atorlugu nakorsiartitsisarnissamik suleqatigiinnissamik isumaqatigiissuteqarfigaa, taamaaliornikkullu Roskildemi Sjællands Universitetshospitalianit sianiutinut tunngasunik immikkoortortaqarfimmit immikkut ilisimasalimmik kalaallit nakorsiartut misissorneqarsinnaallutillu katsorsarneqarsinnaassapput.
Sianiutit pillugit nakorsiarniarluni immikkut ilisimasalimmik tikittoqarnissaanik utaqqerujussuartarneq isumaqatigiissuteqarnerup atorunnaarsissavaa.
- Isumaqatigiissut nutaaq iluaqutsiullugu nakorsaanermi neqeroorutigut amerlipput, aqutsisoqarfiup pisortaa Joanis Erik Køtlum oqarpoq, Sjællands Universitetshospitalimullu sianiutit nappaataannut immikkoortortaqarfimmut toqqaannartumik attaveqarneq kiffartuussinermut nalinginnaasumik sunniuteqanngaatsiartussaq erseqqissaatigaa.
- Sulisutsinnik immikkut ilisimasanik ilitsersuineq illiniagaqassutsikkut nukittorsaaqataasussaq isumaqatigiissummut aamma ilaavoq, tusagassiuutinut nalunaarummi, Joanis Erik Køtlum allappoq.
Aamma atuaruk Qulaarpaa Nakorsat taarseraannerat naammaginanngitsoq
Isumaqatigiissut maajip aallaqqaataani atuutilersussaq, apriilip arfernanni atsiorneqarpoq, kingornalu Nuummi Dronning Ingridip napparsimmavissuani ulluni sisamani sianiutit pillugit nakorsiartitsinermut pikkorissaasoqarpoq.
Taamatut nakorsiarsinnaanerup nutaap sianiutit pillugit nakorsiartut ukiumut 250-it 300-ullu akornanniittut iluaqutsersinnaagai naatsorsuutigineqarpoq.
- Tamanna napparsimasup utaqqivallaarani immikkut ilisimasalimmut nakorsiarsinnaaneranik, nappaammillu suussusersiniaanerup nakorsaanerullu ingerlateqqinneqarsinnaaneranik isumaqarpoq, nakorsat qullersaat Anne Marie Grell Urik oqarpoq.
Qarasaasiaq atorlugu nakorsiartitsinermi videoliat assillu atorlugit innuttaasut immikkut ilisimasalimmit siunnersortissinnaallutillu katsorsartissinnaapput.
