Danmarkimi nutaarsiassaqartitsiviup Ritzauip, aamma KNR-imut nutaarsiassiisartup, qarasaasiai unioqqutitsillutik marlunngornermi iserfigitipput, unioqqutitsillutillu isertut akiliuteqaqqusisimallutik. Nutaarsiassaqartitsivilli Ritzau akiliiumanngilaq.

Ritzauip pisortaanera Lars Vesterløkke taama paasissutissiivoq.

Kikkut qarasaasianut unioqqutitsillutik isersimanersut paasissutissiissutigineqanngilaq, aaqqissuussaalluagaasorli Lars Vesterløkkep oqaatigaa.

AAMMA ATUARUK Garmin inatsisaatsuliorlutik qarasaasianut isertartunit millioninik akileeqquneqartoq

Ritzauip IT-mut immikkoortortaqarfiata qarasaasiat nalinginnaasumik ingerlaqqilernissaat maanna sulissutigaa. Sulinerli siusinnerpaamik sisamanngornermi nalinginnaalissasoq naatsorsuutigaat.

Ritzau qarasaasiatigut marlunngornermi ullaakkut saassunneqarpoq. Qarasaasiatigut saassussisoqarnerani aaqqissuinermi atortut atorunnaarput.

Nutaarsiassaqartitsivik Danmarkimi tusagassiorfinnut annernut amerlanerpaanut nutaarsiassiortuuvoq. Qarasaasiatigut saassussisoqarnerata kingunerisaanik ajornartoornermi aaqqissuussineq atorneqalerpoq, tassanilu nutaarsiassat tusagassiorfinnut allatut nassiussorneqalerlutik.