Qarasaasiamik pinnguarajuttut katsorsarneqartalissapput

Qarasaasiami pinnguaatinik pinnguarumatuut, tamatuminngalu pinngitsuuisinnaajunnaarsimasut, katsorsaavissaat Europami siullerpaaq Amsterdamimi julimi ammassaaq.

- Qarasaasiami pinnguaatit ajortumik kinguneqarnissaannik ilimananngilluinnaraluarlutik, taamaattoq pinngitsuuisinnaajunnaassutaasartunut navianaatilinnut ilaalluinnartuupput, Amsterdamimi katsorsaavissap Jones and Jonesip pisortaa, Keith Bakker oqarpoq.

Taassuma januaarimili inuit 20-t, 13-init 30-tillu akornani ukiullit, katsorsarsimavai. Taakku amerlanersaat pinngitsuuisinnaajunnaarnerminnik kingunerlutsitsillutik qarasaasiamik takullutillu kiagullutillu sajuttarsimapput.

- Meeqqat ilaat ima qarasaasialerisartigaat, allaat inummik toqqarlugu oqaluussinissartik nalornissutigisarlugu, meeqqat tamakku ukiut kingulliit pingasut qarasaasiaq aqqutigalugu allanik oqaloqateqartarput, taamaalillutik inuit akornanni attaveqarnerat ajorsilluinnarsimalluni, Keith Bakker oqarpoq.

Katsorsaaneq sapaatip-akunnerini arfineq-pingasuni sivisussuseqartassaaq, tarnit pissusiinik ilisimasalinnik oqaloqatiginnittoqartassaaq, sammisassanullu allanut soqutiginnilersitsinissaq aamma siunertaavoq.