Qarasaasiami virusi Asprox akornusersuivoq

Qarasaasiami virusip nutaap Asprox-imik taaguuserneqarsimasup, Tuluit Nunaanni qarasaasianik tuusintinik amerlassusilinnik akornusersuisimanissaa ilimagineqarpoq. Qarasaasiat ilaat naalakkersuisoqarfinniittut oqaatigineqarpoq.
Allattoq Mads Lynge
juulip 24-at 2008 06:14

Tuluit aviisiata ‘The Times’ip allaaserisaa naapertorlugu, unioqqutitsillutik allat qarasaasiaannut pulasartut, Europap kangianeersut virusimik, ulluni kingullerni 14-ini siammarterneqartumik pilersitsisimanissaat ilimagineqarpoq.

Qarasaasiakkut virusit ilisimaneqareersut, e-mailitigut siaruarterneqartartut assiginagit, virusi Asprox nittartakkanut toqqorneqarsimasarpoq.

Nittartakkanut kikkunnilluunniit iserfigineqarsinnaasunik ammaasut virusi pissarsiarisinnaavaat. Asprox atuisup qarasaasiaanut nammineerluni ikkuttarpoq, unioqqutitsillutillu allat qarasaasiaannut pulasartut taamaalillutik paasissutissanik piginnittumut tunngasunik pissarsisinnaasarlutik.

Inuit qassit virusi qarasaasiaminni pissarsiarisimaneraat ilisimaneqanngilaq. Aviisimili ‘The Times’-imi isumannaallisaanermik suliaqartut issuarneqarput, nunarsuaq tamakkerlugu ikinnerpaamik inuit 2 miliuunit virusi pissarsiarisimassagaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq