Qarasaasiakkut pinnguaat nioqqutaajunnaarsinniarpaa

Qarasaasiakkut pinnguaat Afghanistanimi sakkutuunik nunarsuup kitaaneersunik eqqaassinermik imaqartoq, nioqqutaajunnaartariaqartoq, Tuluit Nunaanni illersornissamut ministeri Liam Fox isumaqarpoq.

Tuluit illersornissamut ministeriat oqaaseqarpoq pinnguaammi Talibanit sakkutuuattut sorsussinnaaneq amiilaarigini.

Qarasaasiakkut pinnguaat Medal of Honor taama nipeqartarpoq, taassuminngalu pinnguartoq Afghanistanimi iligiiaanik nunarsuup kitaamiuinik Talibaninilluunniit sorsoqateqassanerluni toqqarsinnaavaa.

Tuluit Nunaanni naalakkersuisoqatigiit Konservativiusunit aqunneqartut aallaqqaataaniit namminneq Afghanistanimi sakkutuunut siuliminninngarnit pitsaanerusumik naalakkersuissallutik nalunaaruteqarput, illersornissamullu ministeri Liam Fox isumaqarpoq Tuluit Nunaanni niuertarfiit pinnguaat taanna nioqqutigiunnaartariaqaraat.

- Sakkutuut qanoq atugaqartarnerat amerlanerpaajusugut takorloorsinnaanngilarput taakkualu ataqqisariaqarpavut, Liam Fox allamut tunngatillugu taama oqarpoq. Taassumalu oqaaseqartartuata erseqqissarpaa pinnguaatit taamaattut taamatut pisiarineqarsinnaanerat akaarnanngitsoq, tassa sakkutuut nunarsuup kitaamiut eqqaanneqarsinnaammata, tassami taakkua inuunertik Afghanistanimi sukkulluunniit akigeratarsinnaammassuk.

Pinnguaammilli nioqqutillit Electronic Arts oqarput tamanna ingasappallaamik ilioriarnerusoq.

- Taamatut ajornartorsiulerneq soorunami isumaliutersuutigaarput, pinnguaammili suliavut tamaasa sapinngisamik piviusorsiorpalaartumik suliaraavut, Electronic Artsimeersoq oqarpoq. Suliffeqarfiup taassuma tuluit isornartorsiuinerat akerlilerluinnarpaa. Tamatumunnga aviisi The Sunday Times oqaluttuamik ippassaq saqqummiussisoq isornartorsiorneqarpoq kukkunerarlugulu isumaqarmat tuluit sakkutuui eqqaanneqarsinnaasut.

Medal of Honor sorsuttuusaarluni pinnguaatini nunarsuarmi tunineqarnerpaasarpoq, pinnguaatillu nioqqutaajunnaarnissaanik illersornissamut ministerip kajumissaarinera malinneqassanersoq manna tikillugu nalunaartoqarani.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat