Qaqutigoorluinnartumik Danmarkimi pissutsinut akulerupput
Danmarkimi partiit naalakkersuisuutitaqartut avaqqullugit, Folketingimi illuatungiliuttut, Danmarks Radio, illorsuartaarnermi kingorna akiitsoqaleraluttuinnartoq ikiorsernialerpaat. Qaqutigoorluinnartumik Danmarkimi pissutsinut akulerulluni illuatungiliuttut peqatigalugit Danmarks Radiomik ikiorseeqataalersoq Lars-Emil Johansen oqarpoq kalaallit 18.000-t missaaniittut Danmarkimi najugaqartut eqqarsaatigalugit kiisalu KNR-ip Danmarks Radio angisuumik pissarsiffigisarmagu illuatungiliuttunik taaseqateqarniarluni. – Uani pisumi naaggaaruma naalakkersuisut iluaqusertussaavakka, illuatungiliuttulli iluaquserusunneruakka aamma kalaallinut ajunngitsumik sunniuteqartussaammat, oqarpoq Lars-Emil Johansen.
Lars-Emil Johansen aamma ilisimalluarpaa illuatungiliuttut taaseqatigalugit Danmarks radiop iluaquserneqarnissaa angeramiuk Danmarkimi pissutsinut akulerulluni. – Folketingimili ilaasortatut allatulli tamanna pisinnaatitaaffigaara, akulerutissaarumaarpugut namminersulerutta, Lars-Emil Johansen oqarpoq.
Juliane Henningsenip Lars-Emil Johansenillu saniatigut Konservativiusimasoq Pia Christmas Møller kiisalu illuatungiliuttut tamarmik Danmarks radio ikiorserneqarnissaanut taaseqataaniarput. Venstret Kalaallit Nunaat pillugu oqaaseqartartuata Henrik Høeghip Kalaallit Nunaata Folketingimi ilaasortaatitai kaammattoraluarpai Danmarkimi pissutsinut akuleruteqqunagit.
