Qaqugu suliartoqqissanersut ilisimaneqanngilaq
Ilulissat suliffissuanni sulisut 50-it marsip 17-iannili angerlarartinneqarput, qaqugulu suliartoqinnissaat suli ilisimaneqanngilaq. Sulisunik angerlarartitsineq pivoq, Ilulissani suliffissuup avataani immamik mingutsitsineq unitseqqullugu Avatangiisinut Pisortaqarfik piumasaqareersorlu. Ilulissani sulifissuup pisortaa Shariar Bordbar oqarpoq, misigisimallutik Ilulissani kommunep Royal Greenlandimik tatisimanninneratigut sulisunik angerlarartitsisariaqarsimallutik:
- Sulisunik angerlartitsisariaqarsimanitsinnut, suliffissuup kuuffiata qerisoorsimanera, taamaalillunilu igitassat avataanut ingerlasinnaajunnaarnerat pissutaavoq, Shariar Bordbar oqarpoq. Ilulissat suliffissuanni kuuffimmik qerisoorneq suliffissuarmiit 50 meterinik avasitsigisumi pisimavoq, tamannalu pillugu Ilulissat kommuneat Avatangiisinullu Pisortaqarfik Royal Greenlandimut piumasaqarsimapput piaartumik qanoq iliuuseqartoqaqqullugu. Sulianik qeritinerineq kisiat periarfissaammat, tunisassiorneq unitsikkallarlugu qerititerineq maanna kisimi ingerlanneqarallartoq, tamannalu pissutigalugu sulisut 50-it angerlartinneqarallartariaqarsimasut Shariar Bordbar oqarpoq. Ilulissani suliffissuaq poorskip tungaanut qerititeriinnarallassaaq, tamatumalu kingorna qanoq pisoqarumaarnersoq oqaatigisinnaanngikkallarini, suliffissuup pisortaa oqarpoq.
Ilulissani suliffissuarmi sulisut 50-it soraarsitaanatik angerlarartiinnarneqarput, pisortallu ikiorsiisarnermik peqqussutaat naapertussagaanni ikiorserneqarsinnaanngillat. Inuussutissanut akissaqanngivippata, akiligassanut tamanut naatsorsuutereernerup kingorna inuussutissanut atugassaannik taperneqartariaqalissasut, Ilulissat kommuneata suliffissaqartitsiniarnermut immikkoortaani siunnersorti Thora Siegstad radioaviisimut ilisimatitsivoq.
Ilulissani borgmesteri Anthon Frederiksen sammisamut oqaaseqartinniaraluaratsigu iluatsinngitsoorparput.