Assi: GEUS / Arktisk Kommando

Qaqqat sisoorfioratarsinnaasut 18-it GEUS-ip misissuiffigilerai

GEUS-p, Nunatsinni Danmarkimilu Ujarassiuutut Misissuisoqarfiup, nunatsinni qaqqanit sisoortoqarsinnaanera annertunerusumik paasisarfigiumallugu ornigulluni misissuinera annertooq ukioq mannamit 2021-p tungaanut pisussanngorpoq.

GEUS, ullormi Karrat kangerluani 2017-imi qaqqamit sisoortoqarneranit ukiut marlunngornerini tusagassiorfinnut nalunaarutigaa sumiiffiit sisoorfiusinnaasut tikinneqassasut, immap naqqanik nalunaarsuisoqassasoq nunallu sajunneranik uuttortaavinnik aamma ikkussuisoqassasoq.

Karrat kangerluani qaqqamit sisoortoqarnerata kingorna GEUS nunap assingi, timmisartunit assilisat, assilisat allat paasissutissallu qaammataaneersut atorlugit misissueqqaarpoq. Sumiiffiillu 18-it sukumiinerusumik misissuiffigineqarnissaat misissuinermi tassani inerniliunneqarpoq.

Qaqqat sisoorfiusinnaaasut 18-it Kilde: GEUS

Tamannalu tunngavigalugu qaqqamit sisoorsinnaaneranik misissuinerit maanna nanginneqartussanngorput.

Misissuinerlu 2019-imit 2021-mut pissaaq danskillu naalagaaffiannit Naalakkersuisuniillu aningaasalersugaassalluni.

 

AAMMA ATUARUK Karrat kangerluanni innat sisoorsinnaaneri suli aarlerinaateqartut

Sumiiffiit 18-it misissuiffigineqassapput qaqqaniillu sisoorfiusinnaanerat illoqarfinnut nunaqarfinnullu qaqqat eqqaanniittunut qanoq navianaateqartiginersoq tassaarsuaqartitsisinnaanersullu naliliiffigineqassaaq.

Qaarsut aallaavigalugit juulimi aggustimilu Sornorup eqqaanit Qeqertarsuup kujataatungaanut ornigulluni  misissuisoqassaaq.

Ornigullunilu misissuineq qulimiguulik atorlugu pissaaq, sumiiffiit navianaateqarsinnaasut sivikitsumik tikinneqartassallutik. Silap pissusianik misissuivinnik sumiiffinni taakkunani ikkussuisoqassaaq, qaqqami silap kiassusia ilaatigut ingerlaavartumik malinnaaffigineqassalluni, paasissutissallu GEUS-imut nassiunneqartassallutik.

Qaqqanit sisoornerit annertunerusut kilometerit 100-t sinnerlugit ungasissusilimmit nalunaarsorneqarsinnaassapput, uuttortaaviillu amerlanerusut nunap ilaani ataatsimi inissinneqariarpata qaqqap sisoorfiusup sumiinnera piffissallu qanoq ilinerani taama pisoqarnersoq naatsorsoruminarnerulissasoq, GEUS allappoq. Nunap sajunneranik uuttortaaviit Qeqertarsuup Uummannallu akornanniittut maanna sisamaasut arfineq-marlunngortinneqassasut aamma oqaatigineqarpoq.

Uuttortaaviit nutaat pingasut Qeqertarsuarmi, Saqqami Niaqornanilu inissinneqassapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat