Qaqqap innermit anitsisup napparsimasut aamma eqqorpai

Arsakut pujoralai pissutigalugit Air Greenlandip Danmarikmut timmisartuussisinnaannginnera pissutigalugu napparsimasut utaqqisariaqarput. Napparsimasulli Islandimi aamma napparsimmavinni piaartumik katsorsagassanngorlugit aallartinneqartassasut, peqqissutsimut naalakkersuisoqarfimmi pisortaq Ann Birkekær Kjeldsen oqarpoq:

- Nalunngilarput ullut tamangajaasa Danmarkimi katsorsartikkiartortussat aallartittaratsigik, napparsimasullu ullumi aallartitassarigaluavut aallartoqarnissaanut kinguartillugit. Napparsimasulli erniinnaartumik maannakkorpiarlu katsorsartittariaqartut pineqarpata taava taakkua Islandimut katsorsartikkiartortillugit timmisartuunneqarnissaat periarfissaqarpoq, taama oqarpoq peqqissutsimut naalakkersuisoqarfimmi pisortaq Ann Birkekær Kjeldsen.

Taassuma napparsimasut Danmarkiminngaanniit ullumi aallartussaagaluit qassiunersut oqaatigisinnaanngilai. Timmisartuussinissanik taamaatitsinerit aammattaaq napparsimasunut Danmarkimeereersunut Kalaallit Nunaannullu angerlartussaagaluanut sunniuteqarpoq. Ann Birkekær Kjeldsen ima oqarpoq:

- Taakkua soorunami najugaqarnissaat atugarissaarnissaallu isumagissavavut, napparsimasullu kalaallit, Islandimimilu napparsimasut kalaallit isumagineqarluartaqaat, napparsimasullu qanorluunnit sivisutigisumik napparsimasut hoteliiniissinnaapput timmisartuussineqaqqilernissaata tungaanut. Kisiannili soorunami Islandimi najugaqarluni angerlarsinnaannginneq taakkununnga ajornartorsiutaassaaq, isumagineqarluassappulli, najugaqarfeqarlutik, paarineqarlutik, passunneqarlutik nerisinneqartarlutillu, taama oqarpoq peqqissutsimut naalakkersuisoqarfimmi pisortaq Ann Birkekær Kjeldsen.

Kalaallit Nunaat napparsimasut katsorsarneqartarnissaat pillugu Islandimik isumaqatigiissuteqareerpoq, napparsimasullu Islandiliartinneqartarnissaat pilerpat Air Greenland tassaassaaq timmisartuussinermik isumaginnittussaq.