Qaqortup Timersortarfissuani illariilittut
Illoqarfiit Qaqortoq, Narsaq Nanortalillu suleqatigiillutik quiasaarisartut tusaamasat Kujataanut aggersarsimavaat.
- Unnuk nuannerluinnartumik ingerlavoq isiginnaariallu nuannisarluinnarput, Kommune Kujallermi timersornermut peqatigiinniffinnullu siunnersorti, Kent Kielsen KNR.gl-imut oqarpoq.
Piitannguaq Alaufesenip kulturikkut illorsuarmi Katuami Valerius Nielsen peqatigalugu qanittukkut aliikkusersuinera iluatsilluarpoq. Maannalu Marie Mathiassen, Maalia, Katuami unnummi kulturisiorfimmi Kalak Jazz peqatigalugit tusarnaartitsigami isiginnaarianit nuannarineqarluartoq, peqasiussimavaa.
Quiasaarisartut avannaamiut marluk assigiinngitsunik quiasaarinerannut inuit 700-nit amerlanerusut timersortarfimmut ippassaq unnukkut isiginnaariarsimapput.
Piitannguaq Alaufesenip ilaatigut quiasaarutini, piniartoq Qaanaarmiu Uulliarsuaq Aapasoq, tusaamasaassutigaa. Maannalu quiasaarutini takuteqqippaa, tamatumuuna piniartup ernutaa - Kingulliarsussuaq Aapasoq - peqatigalugu, tamannalu isiginnaartunit aamma nuannarineqarluarpoq.
Nanortalimmut ullumi ingerlaqqittussaagaluarput, Kujataatali tamarmi anorersuarnera pissutigalugu Kujataani timmisartuussineq tamarmi unitsinneqarsimavoq. Narsamut aqagu aallassapput, Piitannguaq Alaufesenilu Marie Mathiassenilu timersortarfissuarmi aqagu unnukkut aliikkusersiussallutik.
- Neriuppugut Nanortalimmiut, immaqa Paamiormiut suleqatigalugit, kingusinnerusukkut kujataanukarteqqissinnaassagaatigut, Piitannguaq Alaufesen angalanermi matumani Nanortalimmukanngitsoornertik uggoralugu oqarpoq.
